नाशिक : प्रतिनिधी
समाजातील विविध क्षेत्रांत कार्यरत असलेल्या दुर्गप्रेमी, दुर्गसेवक व सामाजिक संघटनांचा गौरव करण्यासाठी शिवकार्य गडकोट संवर्धन संस्था, नाशिक यांच्या वतीने किल्ले रामशेज येथे शंभूराजे जन्मोत्सवानिमित्त भव्य कार्यक्रमाचे आयोजन करण्यात आले होते. यावेळी सामाजिक संघटना गटातून सकल मराठा परिवार, नाशिक यांना प्रतिष्ठेचा “छत्रपती शंभूराजे गडमित्र पुरस्कार” प्रदान करून सन्मानित करण्यात आले.
कार्यक्रमाची सुरुवात ध्वजारोहण, गडपूजन तसेच छत्रपती शिवाजी महाराज आणि छत्रपती संभाजी महाराज यांच्या प्रतिमेचे पूजन करून करण्यात आली. संपूर्ण परिसर शिवमय वातावरणाने दुमदुमून गेला होता. शंभूराजे जन्मोत्सव मोठ्या उत्साहात आणि भक्तिभावाने साजरा करण्यात आला.
या सन्मान सोहळ्यास दुर्गराज रायगड विकास प्राधिकरणचे वास्तू संवर्धक वरुणजी भामरे, पुरातन नाणी संशोधक चेतन राजापूरकर, नाशिकच्या ऐतिहासिक पाऊलखुणांचे संशोधक रमेशजी पडवळ तसेच रामजी खुर्दळ यांची प्रमुख उपस्थिती होती.
यावेळी सकल मराठा परिवार नाशिकचे खंडू आहेर, दत्ता काळे, स्नेहल चौधरी (काळे), प्रविण देशमुख, योगेश वरखेडे, ॲड. गौरव मोहिते, कैलास देशमुख, समाधान पाटील यांच्यासह अनेक शिवप्रेमी, दुर्गसंवर्धक व दुर्गप्रेमी मोठ्या संख्येने उपस्थित होते.
हा सन्मान संपूर्ण सकल मराठा परिवारातील प्रत्येक शिवप्रेमी बांधवाचा असून, गडकोट संवर्धन व शिवकार्याची प्रेरणा अधिक बळकट करणारा असल्याची भावना उपस्थितांनी व्यक्त केली.
