चामोर्शी | दि. १५ मे
गहाळ व चोरीस गेलेल्या मोबाईल प्रकरणांवर प्रभावी कारवाई करत चामोर्शी पोलिसांनी तब्बल २ लाख ३९ हजार रुपये किमतीचे ११ अँड्रॉइड मोबाईल हस्तगत करण्यात यश मिळवले आहे. तांत्रिक तपास आणि CEIR पोर्टलच्या सहाय्याने करण्यात आलेल्या या कारवाईमुळे संबंधित नागरिकांना मोठा दिलासा मिळाला आहे.
मागील काही महिन्यांपासून चामोर्शी परिसरातून हरविलेले तसेच चोरीस गेलेले मोबाईल शोधण्यासाठी पोलिसांकडून विशेष मोहीम राबविण्यात आली होती. तांत्रिक कौशल्याचा वापर करून संबंधित मोबाईलचा मागोवा घेत पोलिसांनी हे मोबाईल हस्तगत केले.
पोलीस ठाण्याच्या वार्षिक निरीक्षणासाठी आलेले गडचिरोली परिक्षेत्राचे पोलीस उपमहानिरीक्षक योगेश कुमार यांच्या हस्ते संबंधित तक्रारदारांना मोबाईल परत करण्यात आले. यावेळी गडचिरोलीचे पोलीस अधीक्षक एम. रमेश, अपर पोलीस अधीक्षक (अभियान) कार्तिक मधीरा तसेच उपविभागीय पोलीस अधिकारी तथा सहाय्यक पोलीस अधीक्षक अनिकेत हिरडे उपस्थित होते.
ही कारवाई चामोर्शी पोलीस ठाण्याचे पोलीस निरीक्षक दीपक डोंब यांच्या मार्गदर्शनाखाली महिला पोलीस अंमलदार मनीषा चिताडे आणि पोलीस अंमलदार भावेश वरगंटीवार यांनी यशस्वीरीत्या पार पाडली.
मोबाईल चोरी व गहाळ प्रकरणांमध्ये तांत्रिक तपासाच्या माध्यमातून नागरिकांना दिलासा देणारी ही कारवाई ठरली असून, चामोर्शी पोलिसांच्या कार्यक्षमतेचे सर्वत्र कौतुक होत आहे. जिल्हा पोलीस दलासाठी ही कामगिरी प्रतिष्ठेची मानली जात आहे.
