“गावांचा कारभार अखेर चालतोय कोणाच्या भरोशावर?” नागरिकांचा संतप्त सवाल
उमरखेड प्रतिनिधी
उमरखेड तालुक्यातील अनेक ग्रामपंचायतींमध्ये सरपंच व सदस्यांचा कार्यकाळ संपूनही अद्याप प्रशासकांची नियुक्ती करण्यात आलेली नसल्याने ग्रामीण प्रशासनाचा कारभार अक्षरशः ठप्प झाल्याचे चित्र समोर येत आहे. ग्रामपातळीवरील विकासकामे, शासकीय योजनांची अंमलबजावणी तसेच नागरिकांच्या मूलभूत प्रश्नांवर परिणाम होत असल्याने ग्रामस्थांमध्ये तीव्र नाराजी पसरली आहे.
ग्रामपंचायत ही ग्रामीण भागातील प्रशासनाची महत्त्वाची यंत्रणा मानली जाते. मात्र लोकप्रतिनिधींचा कार्यकाळ संपल्यानंतरही प्रशासनाने प्रशासक नेमण्याबाबत दाखवलेली उदासीनता धक्कादायक असल्याची भावना ग्रामस्थ व्यक्त करत आहेत.
अनेक गावांमध्ये अधिकृत निर्णय घेण्यासाठी सक्षम यंत्रणा नसल्याने विकासकामे रखडली असून विविध शासकीय फायली प्रलंबित अवस्थेत पडून आहेत. पाणीपुरवठा, स्वच्छता, रस्ते, दिवाबत्ती यांसारख्या मूलभूत सुविधांबाबतही अडचणी निर्माण होत असल्याची तक्रार नागरिकांनी केली आहे.
ग्रामस्थांच्या मते, “लोकप्रतिनिधींचा कार्यकाळ संपल्यानंतर तातडीने प्रशासक नेमणे ही प्रशासनाची जबाबदारी आहे. मात्र संबंधित विभागाकडून याकडे पूर्णपणे दुर्लक्ष करण्यात येत आहे. गावांचा कारभार नेमका कोणाच्या भरोशावर सुरू आहे?” असा संतप्त सवाल नागरिक उपस्थित करत आहेत.
यासोबतच ग्रामपंचायत निधी, मंजूर विकासकामे आणि विविध योजनांच्या अंमलबजावणीवरही प्रश्नचिन्ह निर्माण झाले आहे. काही ठिकाणी अपूर्ण कामे रखडून पडली असून प्रशासनाच्या ढिसाळ कारभारामुळे ग्रामीण विकासाला मोठा ब्रेक लागल्याचे बोलले जात आहे.
स्थानिक नागरिकांनी तातडीने प्रशासकांची नियुक्ती करून ग्रामपंचायतींचा कारभार सुरळीत करण्याची मागणी केली आहे. अन्यथा तीव्र आंदोलन छेडण्याचा इशाराही ग्रामस्थांनी दिला आहे.
दरम्यान, संबंधित विभागातील अधिकाऱ्यांकडून याबाबत अद्याप कोणतीही स्पष्ट भूमिका समोर आलेली नसल्याने नागरिकांमध्ये संभ्रम आणि संतापाचे वातावरण कायम आहे. “कारभार ठप्प, विकास रखडलेला आणि प्रशासन मात्र मौन” अशी तीव्र प्रतिक्रिया ग्रामस्थ व्यक्त करत आहेत.
