दौंड: (प्रतिनिधी)
दौंड विधानसभा मतदारसंघाच्या पहिल्या महिला आमदार तथा ज्येष्ठ सामाजिक कार्यकर्त्या उषादेवी कृष्णराव जगदाळे यांचे गुरुवारी (दि. १४ मे २०२६) निधन झाले. त्यांच्या निधनाने दौंड तालुक्यासह पुणे जिल्ह्याच्या राजकीय, सामाजिक आणि शैक्षणिक क्षेत्रात हळहळ व्यक्त केली जात असून, एका कर्तृत्ववान नेतृत्वाचा अंत झाल्याची भावना व्यक्त होत आहे.
उषादेवी जगदाळे या दौंड गावचे पाटील आणि माजी आमदार स्वर्गीय कृष्णराव जगदाळे पाटील यांच्या पत्नी होत. विवाहानंतर त्यांनी स्वतःला सामाजिक व राजकीय कार्यासाठी वाहून घेतले. त्यांनी १९७२ ते १९७७ आणि १९८५ ते १९९० या कालावधीत दौंड विधानसभा मतदारसंघाचे प्रतिनिधित्व करत पहिल्या महिला आमदार म्हणून उल्लेखनीय कार्य केले.
त्या दौंड नगरपरिषदेच्या पहिल्या लोकनियुक्त नगराध्यक्ष देखील होत्या. आपल्या राजकीय कारकिर्दीत त्यांनी तत्कालीन मुख्यमंत्री यशवंतराव चव्हाण, वसंतराव नाईक आणि शरद पवार यांच्यासह अनेक दिग्गज नेत्यांसोबत काम केले. तसेच विधानसभेत माजी राष्ट्रपती प्रतिभाताई पाटील आणि खासदार केशरबाई क्षीरसागर यांच्या त्या सहकारी होत्या.
दौंड तालुक्याच्या विकासासाठी त्यांनी मोलाचे योगदान दिले. विशेषतः पुणे-दौंड रेल्वे शटल सेवा सुरू करण्यात त्यांचा महत्त्वाचा वाटा होता. त्यांच्या सामाजिक आणि राजकीय योगदानाची दखल घेत त्यांना ‘दौंड भूषण’ पुरस्काराने गौरविण्यात आले होते.
शिक्षण क्षेत्रातही त्यांनी उल्लेखनीय काम करत खोर (ता. दौंड) येथे सरस्वती शिक्षण संस्थेची स्थापना केली. ग्रामीण भागातील विद्यार्थ्यांना शिक्षणाची संधी उपलब्ध करून देण्यासाठी त्यांनी सातत्याने प्रयत्न केले.
त्यांचा सामाजिक व राजकीय वारसा त्यांचे पुत्र पुणे जिल्हा परिषदेचे अध्यक्ष वीरधवल जगदाळे, माजी नगराध्यक्ष इंद्रजीत जगदाळे आणि दौंडच्या विद्यमान नगराध्यक्ष दुर्गादेवी जगदाळे पुढे नेत आहेत.
उषादेवी जगदाळे यांच्या निधनामुळे दौंड तालुक्याने एक खंबीर, दूरदृष्टी असलेले आणि जनसामान्यांशी नाळ जपणारे नेतृत्व गमावले असल्याची भावना सर्व स्तरांतून व्यक्त केली जात आहे.
