पांढरकवडा वार्ता :
दि. १५/०५/२०२६
यवतमाळ-जोडमोहा-मोहदा मार्गावर गोवंशाची तस्करी करणारा कंटेनर ग्रामस्थांच्या सतर्कतेमुळे पकडण्यात आला. या कारवाईत सुमारे ४० गोवंशीय जनावरांची सुटका करण्यात आली असून आरोपींना पोलिसांच्या ताब्यात देण्यात आले आहे.
मिळालेल्या माहितीनुसार, HR55 T 4295 क्रमांकाचा कंटेनर यवतमाळहून जोडमोहा मार्गे तेलंगणाच्या दिशेने जात होता. यावेळी जोडमोहा परिसरात ट्रॅक्टर आणि बैलबंडीला अल्पशी धडक देत कंटेनर भरधाव वेगाने पांढरकवड्याकडे निघाला.
घटनेनंतर जोडमोहा येथील युवकांनी कंटेनरचा पाठलाग सुरू केला. मोहदा येथे ग्रामस्थांच्या मदतीने कंटेनर अडवण्यात आला. तपासणीदरम्यान कंटेनरमध्ये बैल, गायी आणि वासरे अशा सुमारे ४० गोवंशीय जनावरांची अमानुषरीत्या वाहतूक होत असल्याचे आढळून आले.
ग्रामस्थांनी तात्काळ पोलिसांना माहिती दिल्यानंतर पोलिसांच्या मदतीने सर्व जनावरांची सुटका करून त्यांना पांढरकवडा येथील गोशाळेत पाठविण्यात आले. तसेच कंटेनरमधील चालकासह इतर आरोपींना पोलिसांच्या स्वाधीन करण्यात आले.
या प्रकरणी आरोपींविरुद्ध गोवंश हत्या बंदी कायद्यांतर्गत गुन्हा दाखल करण्यात आला असून कंटेनरसह लाखो रुपयांचा मुद्देमाल जप्त करण्यात आला आहे. या कारवाईमुळे परिसरात ग्रामस्थांच्या सतर्कतेचे कौतुक होत आहे.
