शिरूर अनंतपाळ (विशेष प्रतिनिधी):
लातूर जिल्ह्यात अवैध धंदे, जुगार आणि सट्टेबाजीवर प्रभावी आळा घालण्यासाठी पोलीस प्रशासनाने विशेष मोहीम तीव्र केली आहे. या मोहिमेअंर्तगत स्थानिक गुन्हे शाखेच्या पथकाने शिरूर अनंतपाळ तालुक्यातील येरोळ मोड येथे एका हॉटेलजवळ धाड टाकून, कारमध्ये बसून आयपीएल क्रिकेट सामन्यावर ऑनलाईन सट्टा चालवणाऱ्या एका आरोपीला रंगेहात अटक केली आहे. या धडक कारवाईत पोलिसांनी तब्बल ७ लाख ६ हजार ७१० रुपयांचा मुद्देमाल जप्त केला आहे. तातेराव शिवाजी दंडीमे (वय ३४ वर्षे, रा. स्वामी विवेकानंद नगर, निडेवन रोड, उदगीर) असे अटक करण्यात आलेल्या आरोपीचे नाव आहे.
१५ मे २०२६ रोजी रात्री पोलीस अधीक्षक अमोल तांबे यांच्या निर्देशानुसार आणि अपर पोलीस अधीक्षक मंगेश चव्हाण यांच्या मार्गदर्शनाखाली स्थानिक गुन्हे शाखेचे सहायक पोलीस निरीक्षक सदानंद भुजबळ यांचे पथक गस्तीवर होते. यादरम्यान, येरोळ मोड येथील एका हॉटेलजवळ मारुती सुझुकी स्वीफ्ट कारमध्ये एक इसम आयपीएल स्पर्धेतील ‘लखनऊ सुपर जायंट्स विरुद्ध चेन्नई सुपर किंग्ज’ या सामन्यावर पैसे लावून ऑनलाईन सट्टा चालवत असल्याची खात्रीशीर माहिती पोलिसांना मिळाली. माहिती मिळताच पथकाने रात्री १०:५० वाजण्याच्या सुमारास मिळालेल्या ठिकाणी सापळा रचून संशयित मारुती स्वीफ्ट कारला (क्रमांक MH-55-B-0534) घेरले आणि कारमधील तातेराव दंडीमे याला ताब्यात घेतले.
पोलिसांनी आरोपीची आणि वाहनाची झडती घेतली असता, तो मोबाईल आणि लॅपटॉपच्या माध्यमातून थेट आयपीएल सामन्यांवर ऑनलाईन बेटिंग स्वीकारत असल्याचे प्राथमिक चौकशीत निष्पन्न झाले. पोलिसांनी घटनास्थळावरून एक मारुती सुझुकी स्वीफ्ट कार, दोन Vivo कंपनीचे मोबाईल फोन, एक Acer कंपनीचा लॅपटॉप, सट्ट्याच्या हिशोबासाठी वापरण्यात येणाऱ्या डायऱ्या, कॅल्क्युलेटर आणि रोख रक्कम असा एकूण ७ लाख ६ हजार ७१० रुपयांचा मुद्देमाल जप्त केला आहे.
या प्रकरणी आरोपी तातेराव दंडीमे विरुद्ध ‘महाराष्ट्र जुगार प्रतिबंधक कायदा’ अंतर्गत शिरूर अनंतपाळ पोलीस ठाण्यात गुन्हा दाखल करण्यात आला असून या रॅकेटमध्ये आणखी कोणाचा सहभाग आहे का, याचा पुढील तपास शिरूर अनंतपाळ पोलीस करत आहेत.
ही उल्लेखनीय कामगिरी पोलीस अधीक्षक श्री. अमोल तांबे, अप्पर पोलीस अधीक्षक श्री. मंगेश चव्हाण यांच्या मार्गदर्शनाखाली स्थानिक गुन्हे शाखेचे सहायक पोलीस निरीक्षक सदानंद भुजबळ, पोलीस उपनिरीक्षक प्रमोद देशमुख, अंमलदार तुळशीराम बरुरे, सूर्यकांत कलमे, पाराजी पुठ्ठेवाड, राजेश कंचे, प्रदीप स्वामी, अंजली गायकवाड तसेच शिरूर अनंतपाळ पोलीस ठाण्याचे अंमलदार घाडगे व साठे यांच्या पथकाने केली आहे. लातूर जिल्ह्यात कायदा व सुव्यवस्था अबाधित ठेवण्यासाठी क्रिकेट सट्टा, ऑनलाईन जुगार व अवैध धंद्यांविरुद्धची मोहीम यापुढेही अधिक तीव्र केली जाईल, त्यामुळे नागरिकांनी अशा प्रकारच्या बेकायदेशीर कृत्यांची माहिती तात्काळ पोलिसांना द्यावी, असे आवाहन लातूर जिल्हा पोलीस प्रशासनातर्फे करण्यात आले आहे.
