वझरे (ता. आजरा) | प्रतिनिधी
वझरे येथील बौद्ध बांधव आणि ग्रामस्थांच्या वतीने नव्याने उभारण्यात आलेल्या भव्य **‘नालंदा बुद्ध विहार’**चा लोकार्पण सोहळा राज्याचे वैद्यकीय शिक्षण मंत्री हसन मुश्रीफ यांच्या हस्ते अत्यंत उत्साहपूर्ण आणि मंगलमय वातावरणात संपन्न झाला.
या सोहळ्यास प्रमुख पाहुणे म्हणून जिल्हा परिषद सदस्य शिरीषभाऊ देसाई, माजी जिल्हा परिषद सदस्य वसंतराव धुरे, काशिनाथ तेली, कॉ. संपतराव देसाई तसेच पूजनीय भन्ते अशकश्यपायन उपस्थित होते. धार्मिक विधी, बुद्ध वंदना आणि जयघोषात कार्यक्रमाला विशेष रंगत आली.
कार्यक्रमाला विविध क्षेत्रांतील मान्यवर आणि ग्रामस्थ मोठ्या संख्येने उपस्थित होते. यामध्ये बी. के. कांबळे, शशिकांत जाधव, सरपंच सौ. गुरव, विजयराव वांगणेकर, बापू निऊंगरे, युवराज येसणे, डॉ. कांबळे, संजय केसरकर, शिवाजी पाटील आणि तुषार घोरपडे यांचा समावेश होता.
या प्रसंगी ग्रामस्थांच्या वतीने मंत्री हसन मुश्रीफ आणि इतर मान्यवरांचा सत्कार करण्यात आला. तसेच बुद्ध विहार उभारणीसाठी योगदान देणाऱ्या कार्यकर्त्यांचाही गौरव करण्यात आला.
सभेत बोलताना मंत्री हसन मुश्रीफ म्हणाले, “भगवान बुद्धांचे शांतता, समता आणि करुणेचे विचार आजच्या समाजासाठी अत्यंत मार्गदर्शक आहेत. वझरे गावात उभारण्यात आलेले हे बुद्ध विहार सामाजिक ऐक्य आणि प्रबोधनाचे केंद्र ठरेल.”
नव्याने बांधण्यात आलेल्या नालंदा बुद्ध विहाराला आकर्षक रोषणाई करण्यात आली होती. सामूहिक बुद्ध वंदनेने कार्यक्रमाची सांगता झाली. या ऐतिहासिक सोहळ्यामुळे वझरे आणि आजरा परिसरात उत्साहाचे वातावरण निर्माण झाले होते.
