पनवेल/कामोठे प्रतिनिधी
भारतीय जनता पार्टीचे युवा नेते, पनवेल महापालिकेचे माजी सभागृहनेते व विद्यमान नगरसेवक परेश ठाकूर यांच्या वाढदिवसानिमित्त कामोठेत भव्य कुस्ती स्पर्धांचे आयोजन करण्यात आले आहे. सोमवार, दि. १८ मे २०२६ रोजी कामोठे सेक्टर ०६ येथील लोकनेते रामशेठ ठाकूर विद्यालयाच्या भव्य मैदानावर “मा.श्री.परेशशेठ ठाकूर केसरी २०२६” हा जंगी कुस्तीचा थरार रंगणार आहे.
या स्पर्धेत महाराष्ट्रातील व देशातील नामवंत पैलवान सहभागी होणार असल्याने क्रीडाप्रेमींसाठी ही एक ‘मिनी महाराष्ट्र केसरी’ पर्वणी ठरणार आहे. शुक्रवारी (दि. १५ मे) कामोठे येथे आयोजित पत्रकार परिषदेत आमदार प्रशांत दादा ठाकूर यांच्या उपस्थितीत या स्पर्धेची अधिकृत घोषणा करण्यात आली.
भारतीय जनता युवा मोर्चा कामोठे आणि रायगड जिल्हा कुस्ती असोसिएशन यांच्या संयुक्त विद्यमाने या भव्य कुस्ती सामन्यांचे आयोजन करण्यात आले आहे.
परेश ठाकूर यांच्या वाढदिवसाचे औचित्य साधून दरवर्षी या मैदानावर भव्य क्रीडा स्पर्धांचे आयोजन केले जाते. यंदाही परंपरेनुसार कुस्तीचा हा महासंग्राम आयोजित करण्यात आला असून, यासाठी भव्य मैदानाची आणि इतर आवश्यक तयारी अंतिम टप्प्यात आली आहे.या स्पर्धेत माती आणि गादी अशा दोन्ही प्रकारांत थरारक लढती पाहायला मिळणार आहेत.
विजेत्या पैलवानांना आकर्षक रोख बक्षिसे आणि मानाची “परेशशेठ ठाकूर केसरी” गदा देऊन गौरविण्यात येणार आहे. या पत्रकार परिषदेला भारतीय जनता युवा मोर्चाचे पदाधिकारी आणि रायगड जिल्हा कुस्ती असोसिएशनचे सदस्य उपस्थित होते.
त्यांनी पनवेल आणि कामोठे परिसरातील सर्व क्रीडाप्रेमींनी व नागरिकांनी या कुस्तीचा थरार पाहण्यासाठी मोठ्या संख्येने उपस्थित राहण्याचे आवाहन केले आहे.
