पनवेल|कळंबोली|(प्रतिनिधी):
तरुणाईला ड्रग्ज आणि विविध व्यसनांच्या विळख्यातून बाहेर काढण्यासाठी आणि एक निरोगी समाज निर्माण करण्यासाठी कळंबोली पोलीस ठाण्याच्या वतीने रविवारी, १६ मे २०२६ रोजी ‘नशामुक्त शहर जनजागृती, मार्गदर्शन व समुपदेशन’ अभियानाचे आयोजन करण्यात आले होते. रोडपाली बस डेपो, सेक्टर १६, कळंबोली येथे पार पडलेल्या या कार्यक्रमात पोलीस अधिकारी आणि लोकप्रतिनिधींनी अमली पदार्थ विक्रेत्यांवर अत्यंत कठोर कारवाई करण्याचा इशारा दिला आहे.
या विशेष जनजागृती मोहिमेचे आयोजन कळंबोली पोलीस ठाण्याचे वरिष्ठ पोलीस निरीक्षक राजेंद्र कोते आणि अमली पदार्थ विरोधी पथकाचे (ANC) वरिष्ठ पोलीस निरीक्षक संदीप निगडे यांनी केले होते. या कार्यक्रमाला परिसरातील नगरसेवक, सामाजिक कार्यकर्ते, राजकीय नेते, प्रतिष्ठित नागरिक आणि मोठ्या संख्येने तरुण उपस्थित होते.
डएसीपी विक्रम कदमकार्यक्रमात बोलताना सहाय्यक पोलीस आयुक्त (एसीपी) विक्रम कदम यांनी अमली पदार्थांची विक्री करणाऱ्यांवर कडक शब्दांत प्रहार केला. “कळंबोली परिसरात कोणत्याही प्रकारच्या अमली पदार्थांची विक्री किंवा वाहतूक खपवून घेतली जाणार नाही. ड्रग्ज पेडलर्सवर पोलीस प्रशासन अत्यंत कठोर कायदेशीर कारवाई करणार आहे,” असा थेट इशारा त्यांनी दिला. तसेच, युवकांनी कोणत्याही छुप्या व्यसनाला बळी न पडता आपले भविष्य उज्ज्वल घडवण्यावर लक्ष केंद्रित करावे, असे आवाहन त्यांनी केले.
आमदार विक्रांत पाटीलया अभियानात उपस्थित राहून आमदार विक्रांत पाटील यांनी देखील समाजातील वाढत्या व्यसनाधीनतेबद्दल तीव्र चिंता व्यक्त केली. ते म्हणाले की, “आजची तरुण पिढी व्यसनाच्या आहारी जाणे हे संपूर्ण समाजासाठी घातक आहे. हे रोखण्यासाठी केवळ पोलीस नाही, तर प्रत्येक कुटुंबाने आणि नागरिकाने जागरूक राहण्याची गरज आहे.” त्यांनी ‘ड्रग्स फ्री कळंबोली, नशामुक्त कळंबोली’ या मोहिमेचे कौतुक करत अशा प्रकारच्या जनजागृतीची सातत्याने गरज असल्याचे प्रतिपादन केले.
या कार्यक्रमात वरिष्ठ पोलीस निरीक्षक संदीप निगडे आणि राजेंद्र कोते यांनी उपस्थितांना अमली पदार्थांचे शरीरावर आणि आयुष्यावर होणारे दुष्परिणाम याबद्दल मार्गदर्शन केले. तसेच, व्यसनाच्या आहारी गेलेल्या तरुणांना योग्य समुपदेशन करून मुख्य प्रवाहात आणण्याचे आश्वासन दिले. या मोहिमेला कळंबोलीकरांनी मोठा पाठिंबा दर्शवला असून, परिसरातील नागरिकांमध्ये या उपक्रमामुळे समाधानाचे वातावरण आहे.
