कन्नड | प्रतिनिधी
महिलांच्या आरोग्याशी संबंधित वाढत्या समस्यांच्या पार्श्वभूमीवर सरकारी रुग्णालयात आता स्वतंत्र ‘पीसीओडी क्लिनिक’ कार्यान्वित करण्यात आले आहे. आमदार संजना जाधव यांच्या विशेष पाठपुराव्यामुळे ही सुविधा सुरू झाली असून, ग्रामीण भागातील किशोरवयीन मुली आणि महिलांना याचा मोठा लाभ होणार आहे.
आजच्या बदलत्या जीवनशैली, अयोग्य आहार आणि तणावामुळे महिलांमध्ये पीसीओडी / पीसीओएस सारख्या हार्मोनल समस्यांचे प्रमाण वाढत आहे. खासगी रुग्णालयांमधील उपचार खर्चिक असल्याने अनेक महिलांना वेळेत उपचार मिळत नव्हते. ही बाब लक्षात घेऊन सरकारी रुग्णालयातच विशेष क्लिनिक सुरू करण्याचा निर्णय घेण्यात आला.
क्लिनिकमध्ये उपलब्ध सुविधा
- तज्ज्ञ डॉक्टरांकडून मोफत सल्ला व उपचार
- हार्मोनल तपासणी व आवश्यक वैद्यकीय चाचण्या
- आहारतज्ज्ञांकडून डाएटविषयक मार्गदर्शन
- व्यायाम व जीवनशैली सुधारण्याबाबत समुपदेशन
- किशोरवयीन मुलींसाठी मासिक पाळीशी संबंधित विशेष मार्गदर्शन
याबाबत बोलताना आमदार संजना जाधव म्हणाल्या, “महिला निरोगी असतील तर संपूर्ण कुटुंब निरोगी राहते. ग्रामीण भागातील महिलांना पीसीओडीसारख्या आजारांवर वेळेत आणि परवडणारे उपचार मिळावेत, हा या उपक्रमामागचा मुख्य हेतू आहे. जास्तीत जास्त महिलांनी या सुविधेचा लाभ घ्यावा.”
या उपक्रमाचे नागरिकांतून स्वागत होत असून, आरोग्य विभागाने क्लिनिकसाठी आवश्यक त्या सर्व सुविधा उपलब्ध करून दिल्याची माहिती देण्यात आली आहे.
