बंजारा तांड्यातील सिमेंट रोड व नाली बांधकामावर नागरिकांचा संताप; निकृष्ट काम तात्काळ बंद करण्याची मागणी
उमरखेड प्रतिनिधी
उमरखेड शहरातील बंजारा तांडा परिसरात सुरू असलेल्या सिमेंट रोड, ट्रेन लादीकरण व नाली बांधकामातील कथित गैरव्यवहारामुळे परिसरातील नागरिकांमध्ये संतापाचे वातावरण निर्माण झाले आहे. तब्बल ४० लाख रुपयांच्या मंजूर निधीच्या कामात निकृष्ट साहित्य वापरून बोगस पद्धतीने काम सुरू असल्याचा गंभीर आरोप स्थानिक नागरिकांनी केला आहे.
सदर कामाचा कालावधी १८० दिवसांचा असून अंतिम मुदत २९ डिसेंबर २०२५ पर्यंत असल्याचे सांगितले जात आहे. मात्र प्रत्यक्षात कामाच्या गुणवत्तेबाबत अनेक प्रश्न उपस्थित होत आहेत. नागरिकांच्या म्हणण्यानुसार, बांधकामात जुने व गंजलेले स्टील, नाल्यातील रेती, माती तसेच निकृष्ट दर्जाचे मिश्रण वापरले जात आहे. त्यामुळे भविष्यात रस्ता व नालीचे बांधकाम तडे जाणे किंवा कोसळण्याची भीती व्यक्त केली जात आहे.
स्थानिक नागरिकांनी संबंधित ठेकेदाराला “काम इस्टिमेटप्रमाणे आणि दर्जेदार करा, अन्यथा काम बंद करा,” अशी मागणी केली असता ठेकेदाराने दादागिरीची भाषा वापरत शिवीगाळ केल्याचाही आरोप करण्यात आला आहे. यामुळे परिसरात भीतीचे वातावरण निर्माण झाले असून प्रशासनाच्या भूमिकेवरही प्रश्न उपस्थित होत आहेत.
विशेष म्हणजे, घटनास्थळी संबंधित अभियंता श्री. कुबडे उपस्थित असतानाही कथितरीत्या नियमबाह्य काम सुरू असल्याचा आरोप नागरिकांनी केला आहे. त्यामुळे “प्रशासनाच्या डोळ्यादेखत निकृष्ट काम सुरू आहे का?” असा सवाल आता उपस्थित केला जात आहे.
या प्रकरणी सामाजिक कार्यकर्ते दारासिंग रुडे यांनी मुख्याधिकाऱ्यांकडे लेखी निवेदन देऊन उच्चस्तरीय चौकशीची मागणी केली आहे. स्वतंत्र तांत्रिक समिती नेमून कामाचा दर्जा तपासावा, चौकशी पूर्ण होईपर्यंत काम थांबवावे आणि दोषींवर कठोर कारवाई करावी, अशी मागणी त्यांनी केली आहे.
दरम्यान, प्रशासनाने वेळेत दखल न घेतल्यास लोकशाही मार्गाने तीव्र आंदोलन छेडण्यात येईल, असा इशाराही नागरिकांनी दिला आहे. त्यामुळे आता नगर परिषद प्रशासन या गंभीर आरोपांवर काय भूमिका घेते, याकडे उमरखेड शहराचे लक्ष लागले आहे.
