नगराध्यक्ष व मुख्याधिकाऱ्यांच्या पुढाकारातून शहर विकासाच्या महत्त्वाच्या विषयांवर लवकरच नवे निर्णय अपेक्षित
धाराशिव | प्रतिनिधी
धाराशिव नगर परिषदेची सोमवार, दि. १८ मे २०२६ रोजी दुपारी १ वाजता आयोजित करण्यात आलेली सर्वसाधारण सभा ऐनवेळी स्थगित करण्यात आली. महाराष्ट्रातील स्थानिक स्वराज्य संस्था मतदारसंघाच्या विधान परिषद निवडणुकांची घोषणा झाल्यानंतर लागू झालेल्या आचारसंहितेच्या पार्श्वभूमीवर हा निर्णय घेण्यात आला.
नगराध्यक्षांच्या दालनात आयोजित करण्यात आलेल्या या सभेमध्ये शहर विकासाशी संबंधित अनेक महत्त्वपूर्ण विषयांवर चर्चा अपेक्षित होती. मात्र निवडणूक प्रक्रिया सुरू झाल्याने प्रशासनाने नियमांचे पालन करत सभा पुढे ढकलण्याचा निर्णय घेतला.
नगराध्यक्ष नेहा राहुल काकडे आणि मुख्याधिकारी नीता अंधारे यांनी नागरिकहिताला प्राधान्य देत विकासकामांबाबत सकारात्मक भूमिका कायम असल्याचे स्पष्ट केले. निवडणूक प्रक्रिया पूर्ण झाल्यानंतर पुढील सर्वसाधारण सभेची तारीख जाहीर करण्यात येईल आणि प्रलंबित विषयांवर नियमबद्ध पद्धतीने निर्णय घेण्यात येतील, असा विश्वास त्यांनी व्यक्त केला.
सभेमध्ये मागील सभेचा वृत्तांत कायम करणे, शहरासाठी महत्त्वाचा ठरणारा रिंग रोड प्रकल्प, जिजाऊ उद्यान व भोगावती घाट सुशोभीकरण, दैनंदिन घनकचरा व्यवस्थापनासाठी नव्याने निविदा प्रक्रिया राबविणे, सन २०२४-२५ मधील निधीतून वायुमायनिंग प्रकल्पास सुधारित प्रशासकीय मान्यता मिळविण्यासाठी प्रस्ताव पाठविणे तसेच सन २०२५-२६ मधील दिव्यांग लाभार्थ्यांसाठी राखीव पाच टक्के निधी वितरण यांसारख्या विषयांवर चर्चा होणार होती.
याशिवाय अग्निशामन विभागासाठी २०२६-२७ च्या डीपीडीसी निधीतून आवश्यक साहित्य खरेदी, दैनंदिन बाजार विकसित करणे तसेच छत्रपती शिवाजी महाराज नाट्यगृहातील विविध विकासकामांबाबतही निर्णय अपेक्षित होते. शहर विकासाच्या दृष्टीने हे विषय महत्त्वाचे असल्याने नागरिकांचे या सभेकडे विशेष लक्ष लागले होते.
दरम्यान, सर्व पक्षांचे नगरसेवक, नगराध्यक्ष, मुख्याधिकारी तसेच नगर परिषदेचे अधिकारी यावेळी उपस्थित होते.
