| गडचिरोली
चुरमुरा येथे प्रदीप लहुजी कोपरे यांच्या घराला लागलेल्या आगीत मोठे नुकसान झाल्याची घटना समोर आली आहे. या घटनेची माहिती मिळताच रामदास मसराम यांनी तात्काळ घटनास्थळी भेट देऊन परिस्थितीची पाहणी केली.
यावेळी त्यांनी बाधित कुटुंबीयांची भेट घेत त्यांना धीर दिला तसेच प्रशासनाकडून तातडीने मदत मिळवून देण्याचे आश्वासन दिले. घटनेची गंभीर दखल घेत आमदार मसराम यांनी आपत्कालीन विभाग तसेच तहसीलदार यांच्याशी दूरध्वनीवरून संपर्क साधत त्वरित पंचनामा व मदतकार्य करण्याच्या सूचना दिल्या.
या आगीत घरातील जीवनावश्यक साहित्य, धान्य, कपडे तसेच इतर वस्तूंचे मोठ्या प्रमाणात नुकसान झाले असल्याची माहिती मिळाली आहे. अचानक लागलेल्या आगीमुळे कुटुंबीयांवर मोठे आर्थिक संकट कोसळले आहे.
घटनास्थळी धनपाल मिसार, मुखरू पाटील देशमुख, रवींद्र कांबळी, गुरु ताटपल्लीवार, शत्रुघ्न देशमुख, भूपेंद्र काळबांदे, संतोष कोरेकार यांच्यासह गावातील नागरिक व स्थानिक पदाधिकारी उपस्थित होते. ग्रामस्थांनीही बाधित कुटुंबाला मदतीचा हात देत सहकार्य केले.
