| गडचिरोली
गडचिरोली-अमीर्झा मार्गावर एका जंगली हत्तीने अचानक मुख्य रस्त्यावर प्रवेश केल्याने परिसरात एकच खळबळ उडाली. रस्त्याच्या कडेला असलेल्या झुडपातून बाहेर आलेल्या हत्तीमुळे काही काळ वाहतूक विस्कळीत झाली असून नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, अमीर्झा रोडवरून प्रवास करणाऱ्या काही दुचाकीस्वारांना अचानक रस्त्याच्या बाजूला हत्ती उभा असल्याचे दिसले. हत्तीचा आक्रमक अवतार पाहून काहींनी जागेवरच वाहने थांबवली, तर काहींनी भीतीपोटी दुचाकी रस्त्यावर सोडून मागे पळ काढला.
प्रत्यक्षदर्शींनी सांगितले की, हत्ती मुख्य रस्त्यावर आल्यानंतर नागरिकांमध्ये मोठी धावपळ उडाली. काही महिला आणि पुरुषांनी जीव वाचवण्यासाठी रस्त्याच्या कडेला आणि जंगलाच्या दिशेने धाव घेतली. काही तरुणांनी आरडाओरडा करत इतरांना सतर्क करण्याचा प्रयत्न केला. सुदैवाने या घटनेत कोणतीही जीवितहानी झाल्याची माहिती समोर आलेली नाही.
दरम्यान, या भागात गेल्या काही दिवसांपासून जंगली हत्तींचा वावर वाढल्याची चर्चा स्थानिकांमध्ये सुरू आहे. मुख्य रस्त्यावरच हत्ती आल्यामुळे प्रवाशांमध्ये भीतीचे वातावरण निर्माण झाले आहे.
स्थानिक नागरिकांनी वन विभागाने तातडीने या घटनेची दखल घेऊन हत्तीला मानवी वस्त्यांपासून आणि मुख्य रस्त्यापासून दूर करण्याची मागणी केली आहे. तसेच नागरिकांनी हत्ती दिसल्यास त्याच्या जवळ जाण्याचा किंवा त्याला चिडवण्याचा प्रयत्न करू नये, असे आवाहनही करण्यात आले आहे.
