दोन उच्चशिक्षित सख्ख्या भावांसह चौघांना अटक; ६ दिवसांची पोलीस कोठडी
गडचिरोली | प्रतिनिधी
गडचिरोली शहरात एटीएम मशीनने शंभराच्या बनावट नोटा नाकारल्यानंतर एका मोठ्या आंतरजिल्हा बनावट नोटांच्या रॅकेटचा धक्कादायक पर्दाफाश झाला आहे. गडचिरोली पोलिसांनी या प्रकरणाचा तपास करत थेट नागपूर येथील एका भाड्याच्या फ्लॅटमध्ये सुरू असलेल्या बनावट नोटांच्या मिनी प्रिंटिंग प्रेसवर धाड टाकली. या कारवाईत दोन उच्चशिक्षित सख्ख्या भावांसह एकूण चार जणांना अटक करण्यात आली आहे.
मिळालेल्या माहितीनुसार, गडचिरोली शहरातील एका एटीएम मशीनमध्ये काही व्यक्ती पैसे जमा करण्याचा प्रयत्न करत होते. मात्र, मशीनने शंभराच्या काही नोटा बनावट असल्याने त्या स्वीकारण्यास नकार दिला. हा प्रकार लक्षात येताच बँक प्रशासनाने तातडीने गडचिरोली पोलिसांकडे तक्रार दाखल केली.
पोलिसांच्या प्राथमिक तपासात या नोटा नागपूर येथून छापून आणण्यात आल्याची माहिती समोर आली. त्यानंतर पोलिसांनी नागपुरातील संबंधित फ्लॅटवर छापा टाकला. या छाप्यात ५०, १०० आणि २०० रुपयांच्या बनावट नोटा, अत्याधुनिक कलर प्रिंटर, बॉण्ड पेपर, नोटा कापण्याचे साहित्य आणि इतर उपकरणे जप्त करण्यात आली.
या रॅकेटमध्ये मयूर डोईजड आणि आदित्य डोईजड या दोन सख्ख्या भावांचा सहभाग असल्याचे उघड झाले आहे. धक्कादायक बाब म्हणजे, यातील एक जण सिव्हिल इंजिनिअर असून दुसरा मेकॅनिकल इंजिनिअरिंगचे शिक्षण घेत आहे. हे दोघे गेल्या चार वर्षांपासून बनावट नोटा छापून बाजारात चलनात आणत असल्याचा पोलिसांना संशय आहे.
गडचिरोलीचे पोलीस निरीक्षक विनोद चव्हाण यांच्या नेतृत्वाखाली या प्रकरणाचा पुढील तपास सुरू असून अटक करण्यात आलेल्या चारही आरोपींना न्यायालयाने सहा दिवसांची पोलीस कोठडी सुनावली आहे. या रॅकेटमधून आतापर्यंत किती बनावट नोटा बाजारात फिरवल्या गेल्या आणि आणखी कोणाचा सहभाग आहे, याचा तपास पोलीस करत आहेत.
