प्रतिनिधी
बारा ज्योतिर्लिंगांपैकी एक आणि देश-विदेशातील लाखो भाविकांचे श्रद्धास्थान असलेल्या छत्रपती संभाजीनगर जिल्ह्यातील पवित्र घृष्णेश्वर ज्योतिर्लिंग मंदिराच्या विकासासाठी शासनाकडून तब्बल २१० कोटी रुपयांचा निधी मंजूर करण्यात आला आहे. या भरीव निधीमुळे मंदिर परिसरासह वेरूळ क्षेत्राचा सर्वांगीण विकास होणार असून भाविकांना अत्याधुनिक सुविधा उपलब्ध होणार आहेत.
भाविकांसाठी आधुनिक सुविधा
मंजूर निधीतून मंदिर परिसरात विविध विकासकामे हाती घेतली जाणार आहेत. यामध्ये अत्याधुनिक दर्शन रांगा, परिसराचे सुशोभीकरण, स्वच्छतागृहे, पिण्याच्या पाण्याची सुविधा, विश्रामगृहे तसेच वाहनतळाची व्यवस्था उभारण्यात येणार आहे. विशेषतः महाशिवरात्रीसारख्या मोठ्या उत्सवावेळी येणाऱ्या लाखो भाविकांना याचा मोठा लाभ होणार आहे.
पर्यटनाला मिळणार चालना
घृष्णेश्वर मंदिर हे धार्मिक स्थळाबरोबरच जागतिक वारसा स्थळ वेरूळ लेण्यांजवळ असल्याने या विकासामुळे धार्मिक पर्यटनाला मोठी चालना मिळणार आहे. स्थानिक स्तरावर रोजगारनिर्मिती आणि व्यवसायाच्या संधीही वाढतील, अशी अपेक्षा व्यक्त होत आहे.
अनेक वर्षांची मागणी पूर्ण
मंदिर परिसराच्या विस्तारासह मूलभूत सुविधांच्या उभारणीची मागणी गेल्या अनेक वर्षांपासून केली जात होती. अखेर शासनाने २१० कोटी रुपयांचा निधी मंजूर केल्याने भाविक आणि स्थानिक नागरिकांमध्ये आनंदाचे वातावरण आहे.
आगामी काळात या विकासकामांना प्रत्यक्ष सुरुवात होणार असून, त्यामुळे घृष्णेश्वर क्षेत्राचा चेहरामोहरा बदलणार असल्याचे बोलले जात आहे.
