लातूर (प्रतिनिधी): लातूर जिल्ह्यात अवैध अंमली पदार्थांच्या विरोधात सुरू असलेल्या कठोर मोहिमेला मोठे यश आले आहे. स्थानिक गुन्हे शाखेच्या (LCB) पथकाने उदगीर शहरात अत्यंत नियोजनबद्धरीत्या धाडसी छापा टाकून तब्बल २४ किलो ७४० ग्रॅम वजनाचा गांजा जप्त केला आहे. जप्त करण्यात आलेल्या या गांजाची बाजारभावाप्रमाणे किंमत ७ लाख ४२ हजार २०० रुपये आहे. या कारवाईत एका १९ वर्षीय तरुणाला पोलिसांनी रंगेहाथ अटक केली आहे.
गुप्त बातमीदाराच्या माहितीवरून छापा
पोलीस अधीक्षक अमोल तांबे यांनी जिल्ह्यातील अवैध धंदे, गांजा विक्री आणि मादक पदार्थांच्या साठवणुकीविरोधात कठोर कारवाई करण्याचे आदेश दिले आहेत. या अनुषंगाने अपर पोलीस अधीक्षक मंगेश चव्हाण आणि स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वाखाली पथके सक्रिय करण्यात आली होती.
दि. १८ मे २०२६ रोजी स्थानिक गुन्हे शाखेचे पोलीस उपनिरीक्षक प्रमोद देशमुख हे पथकासह उदगीर शहर परिसरात गस्तीवर असताना, त्यांना एका गुप्त बातमीदाराकडून खात्रीशीर माहिती मिळाली. उदगीर येथील मोंढा रोडच्या डाव्या बाजूला असलेल्या “साईनाथ मिर्च मसाला उद्योग” या दुकानात एका इसमाने मोठ्या प्रमाणात गांजा साठवून ठेवला असून तो त्याची अवैध विक्री करत असल्याची माहिती समोर आली.
‘मसाला’ दुकानाच्या आडून ‘गांजा’ची विक्री
माहिती मिळताच पोलीस उपनिरीक्षक देशमुख यांनी वरिष्ठ अधिकाऱ्यांना तात्काळ अवगत केले. त्यानुसार स्थानिक गुन्हे शाखा आणि उदगीर शहर पोलीस ठाण्याचे प्रभारी पोलीस निरीक्षक अशोक अनंत्रे यांच्या मार्गदर्शनाखाली संयुक्त कारवाईचे नियोजन करण्यात आले.
नायब तहसीलदार, दोन शासकीय पंच, प्रमाणित वजन काटा धारक, फॉरेन्सिक विभागाचे अधिकारी आणि व्हिडिओग्राफर यांना सोबत घेऊन सायंकाळी ५:४० वाजण्याच्या सुमारास “साईनाथ मिर्च मसाला उद्योग” या दुकानात पोलिसांनी अचानक छापा टाकला. दुकानाची झडती घेतली असता, एका कोपऱ्यात ठेवलेल्या पिवळ्या रंगाच्या पोत्यामध्ये हिरवट-काळसर रंगाचा, उग्र वास येणारा बि-मिश्रित सुका गांजा आढळून आला.
१९ वर्षांचा युवक जेरबंद: या प्रकरणी पोलिसांनी दुकानात उपस्थित असलेल्या शुभरत्न ऊर्फ कपील बाबुराव गायकवाड (वय १९ वर्षे, रा. फुले नगर, उदगीर जि. लातूर) या तरुणाला ताब्यात घेतले. पोत्यातील पदार्थाची खात्री केली असता तो गांजा असल्याचे निष्पन्न झाले. वजन केले असता एकूण २४ किलो ७४० ग्रॅम गांजा आढळून आला, ज्याची किंमत ७ लाख ४२ हजार २०० रुपये आहे. आरोपी हा गांजा अवैध विक्रीसाठी साठवून ठेवत असल्याचे तपासात समोर आले असून, त्याने हा गांजा कोठून आणला आणि त्याचे इतर साथीदार कोण आहेत, याचा सखोल तपास पोलीस करत आहेत.
आरोपीविरुद्ध उदगीर शहर पोलीस ठाण्यात अंमली पदार्थ विरोधी कायदा गुन्हा दाखल करण्यात आला आहे.
तरुणांनो अंमली पदार्थांपासून दूर राहा: पोलीस प्रशासनाचे आवाहन
“युवकांचे भविष्य उद्ध्वस्त करणाऱ्या समाजविघातक प्रवृत्ती आणि अंमली पदार्थ विक्रेत्यांविरोधातील ही मोहीम यापुढेही अधिक तीव्र केली जाईल. तरुणांनी कोणत्याही प्रकारच्या अंमली पदार्थांच्या आहारी जाऊ नये. तसेच परिसरात अशा प्रकारच्या अवैध धंद्यांची माहिती असल्यास नागरिकांनी तात्काळ पोलिसांशी संपर्क साधावा,” असे आवाहन लातूर पोलीस प्रशासनाने केले आहे.
कारवाई करणारे पथक: सदर उल्लेखनीय कारवाई पोलीस अधीक्षक अमोल तांबे, अपर पोलीस अधीक्षक मंगेश चव्हाण, उपविभागीय पोलीस अधिकारी (उदगीर) गजानन भातलवंडे यांच्या मार्गदर्शनाखाली पोलीस निरीक्षक सुधाकर बावकर, पोलीस निरीक्षक अशोक अनंत्रे, पोलीस उपनिरीक्षक प्रमोद देशमुख, पोलीस अंमलदार संजय कांबळे, सूर्यकांत कलमे, सचिन धारेकर, पाराजी पुठ्ठेवाड, तुळशीराम बरुरे तसेच उदगीर शहर पोलीस ठाण्याचे अंमलदार हारणे, पवार आणि गवळी यांच्या संयुक्त पथकाने यशस्वीरीत्या पार पाडली.
