नेर प्रतिनिधी:
तालुक्यात प्रस्तावित मिनी एमआयडीसी वटफळी-वटफळा परिसरात न करता नेर-दारव्हा रोडलगत उभारण्यात यावी, या मागणीसाठी भाजपने आक्रमक पवित्रा घेत तहसीलदारांना निवेदन दिले आहे. तसेच वटफळी परिसरातील जमिनींचा तातडीने स्पॉट पंचनामा करण्याची मागणीही करण्यात आली.
भाजपच्या निवेदनात नमूद करण्यात आले आहे की, नेर शहरापासून अवघ्या दोन किलोमीटर अंतरावर असलेल्या नेर-दारव्हा रोडवरील जागेवर सहा वर्षांपूर्वी तत्कालीन मंत्र्यांच्या हस्ते एमआयडीसीचे उद्घाटन करण्यात आले होते. त्यावेळी तालुक्याच्या औद्योगिक विकासाचे आश्वासन देण्यात आले होते. मात्र, आता काही प्रभावशाली उद्योजकांनी वटफळी-वटफळा परिसरातील जमिनी अत्यल्प दरात खरेदी करून स्वतःच्या फायद्यासाठी एमआयडीसीचे स्थलांतर करण्याचा प्रयत्न सुरू केल्याचा आरोप भाजपने केला आहे.
गैरव्यवहाराचा आरोप
काही जमीन व्यवहारांमध्ये वरिष्ठ अधिकारी व कर्मचाऱ्यांच्या संगनमताने सातबारा उताऱ्यावर विहिरी, संत्रा लागवड व इतर नोंदी दाखवून शासनाकडून मोठ्या प्रमाणात आर्थिक लाभ घेण्याचा प्रयत्न होत असल्याचेही निवेदनात नमूद करण्यात आले आहे. त्यामुळे संबंधित जमिनींची प्रत्यक्ष पाहणी करून स्पॉट पंचनामा करण्यात यावा, अशी मागणी करण्यात आली.
आंदोलनाचा इशारा
मागणी मान्य न झाल्यास तीव्र आंदोलन छेडण्याचा इशाराही भाजप पदाधिकाऱ्यांनी प्रशासनाला दिला आहे.
यावेळी निलेश राठोड कारभारी, अनिल राठोड, राहुल यादव, आशिष खोडे, प्रकाश यादव, अरुण यादव, प्रीतम गावंडे, ओम यादव, अजय भोयर, उमेश बडगे यांच्यासह अनेक कार्यकर्ते उपस्थित होते.
