शिरूर | प्रतिनिधी :
शिरूर शहरातील नगरपरिषदेच्या अंगणवाड्यांमध्ये बालकांना पुरविण्यात येणाऱ्या पोषण आहाराच्या गुणवत्तेबाबत गंभीर आरोप करण्यात आले आहेत. शिरूर नगरपरिषदेच्या पाणीपुरवठा विभागाच्या सभापती डॉ. सुनिता पोटे यांनी नगराध्यक्ष, उपनगराध्यक्ष आणि मुख्याधिकारी यांना निवेदन देत कथित निकृष्ट दर्जाचा पोषण आहार, अस्वच्छता व अन्न भेसळीच्या आरोपांची सखोल चौकशी करून दोषींवर कठोर कारवाई करण्याची मागणी केली आहे.
निवेदनानुसार, अंगणवाड्यांमध्ये तयार करण्यात येणाऱ्या पोषण आहाराचा दर्जा निकृष्ट असल्याचा आरोप करण्यात आला आहे. तसेच अन्न तयार करण्याची जागा अस्वच्छ असून स्वयंपाकासाठी वापरण्यात येणारी भांडी न धुता पडलेली असल्याचे, तसेच अन्नपदार्थ व खाद्यसाहित्य उघड्यावर ठेवण्यात येत असल्याचे नमूद करण्यात आले आहे.
याशिवाय, संबंधित ठिकाणचे स्वच्छतागृह, स्नानगृह आणि पिण्याच्या पाण्याची व्यवस्था अस्वच्छ असल्याचा आरोपही निवेदनात करण्यात आला आहे. काही खाद्यपदार्थ उंदरांनी कुरतडल्याच्या अवस्थेत असल्याचा दावा करण्यात आला असून, भांडी धुण्याची व्यवस्था, राहण्याची जागा आणि स्वयंपाकाची जागा एकाच ठिकाणी असल्याचेही नमूद करण्यात आले आहे. बालकांसाठी ठेवण्यात आलेली बिस्किटे अस्ताव्यस्त पडलेली होती, तसेच अन्न तयार करण्याच्या परिसरात रंगाचे डबे ठेवण्यात आल्याचाही आरोप करण्यात आला आहे.
डॉ. सुनिता पोटे यांनी संबंधित ठिकाणी सर्व कामे एकाच व्यक्तीकडून केली जात असल्याचा दावा करत या संपूर्ण प्रकाराची माहिती संबंधित ठेकेदार आणि नगराध्यक्षांना दिल्याचे निवेदनात म्हटले आहे. या प्रकरणाची तातडीने सखोल चौकशी करून अन्न भेसळ किंवा अन्य अनियमितता आढळल्यास संबंधितांवर कायदेशीर कारवाई करण्यात यावी, अशी त्यांनी मागणी केली आहे.
दरम्यान, बालकांच्या आरोग्याशी संबंधित या गंभीर आरोपांची प्रशासनाने निष्पक्ष चौकशी करून वस्तुस्थिती स्पष्ट करावी आणि दोषी आढळल्यास कठोर कारवाई करावी, अशी मागणी नागरिकांकडूनही केली जात आहे.
