श्रीरामपूर | प्रतिनिधी
श्रीरामपूर तालुक्यातील बाभळेश्वर रोडवरील खंडाळा गावात एक धक्कादायक घटना घडली असून, मुलानेच आपल्या वडिलांचा खून केल्याची घटना उघडकीस आली आहे. या घटनेमुळे खंडाळा गावासह संपूर्ण तालुक्यात खळबळ उडाली आहे.
मिळालेल्या माहितीनुसार, खंडाळा येथील शेतकरी सचिन प्रभाकर ढोकचौळे (वय ५५) यांचा त्यांचा मुलगा प्रणव सचिन ढोकचौळे (वय २५) याने कथितरित्या डोक्यात कुदळीने वार करून खून केला. ही घटना बुधवारी (दि. ३ जून) पहाटे त्यांच्या राहत्या घरी घडली.
घटनेची माहिती मिळताच श्रीरामपूर शहर पोलीस ठाण्याचे पोलीस निरीक्षक नितीन देशमुख यांनी सहकाऱ्यांसह घटनास्थळी धाव घेतली. पोलिसांनी तत्काळ कारवाई करत आरोपी प्रणव ढोकचौळे याला ताब्यात घेतले असून, पुढील चौकशी सुरू आहे.
घटनास्थळी पंचनामा करण्याचे काम सुरू असून, याप्रकरणी गुन्हा दाखल करण्याची प्रक्रिया सुरू असल्याची माहिती पोलिसांनी दिली. आरोपीने घरगुती वादातून हे कृत्य केले की त्यामागे अन्य काही कारण आहे, याचा तपास पोलीस करत आहेत.
दरम्यान, आरोपीच्या मानसिक स्थितीबाबत विविध चर्चा सुरू असल्या तरी यासंदर्भात कोणतीही अधिकृत पुष्टी झालेली नाही. तपास पूर्ण झाल्यानंतरच घटनेमागील नेमके कारण स्पष्ट होणार आहे.
या दुर्दैवी घटनेमुळे परिसरात हळहळ व्यक्त केली जात असून, पोलिसांकडून प्रकरणाचा सखोल तपास सुरू आहे.
