पुणे | प्रतिनिधी
पुणे महानगरपालिका हद्दीत पुढील आठवड्यापासून एक दिवसाआड पाणीपुरवठा सुरू होण्याची शक्यता व्यक्त केली जात आहे. कमी पर्जन्यमानाच्या अंदाजाच्या पार्श्वभूमीवर पाणीसाठ्याचे नियोजन करण्यासाठी महापालिकेकडून विविध पर्यायांचा विचार सुरू असल्याची माहिती समोर आली आहे.
भारतीय हवामान विभागाने जून ते सप्टेंबर २०२६ या कालावधीसाठी जाहीर केलेल्या सुधारित दीर्घकालीन अंदाजानुसार देशातील एकूण हंगामी पर्जन्यमान सरासरीपेक्षा कमी राहण्याची शक्यता वर्तविण्यात आली आहे. या पार्श्वभूमीवर भविष्यातील पाणीटंचाई टाळण्यासाठी पुणे महानगरपालिका प्रशासनाने उपाययोजनांची तयारी सुरू केली आहे.
महापालिकेच्या पाणीपुरवठा विभागाकडून आठवड्यातून एक दिवस पाणीपुरवठा बंद ठेवणे किंवा शहरात एक दिवसाआड पाणीपुरवठा करणे, अशा पर्यायांवर चर्चा सुरू असल्याचे सांगितले जात आहे. या प्रस्तावांमुळे पाण्याची लक्षणीय बचत होऊ शकते, असा दावा अधिकाऱ्यांकडून करण्यात आला आहे. अंतिम निर्णयासाठी प्रस्ताव महापालिका आयुक्तांकडे सादर करण्यात येणार असून त्यानंतर पुढील प्रक्रिया होणार आहे.
दरम्यान, यापूर्वी पुणे महानगरपालिकेने तातडीने पाणीकपात लागू करण्याचा निर्णय नसल्याचे स्पष्ट केले होते. मात्र मान्सूनची स्थिती, धरणांतील पाणीसाठा आणि आगामी हवामान अंदाज यांचा आढावा घेऊन पुढील निर्णय घेतला जाईल, असे प्रशासनाने म्हटले आहे.
संभाव्य पाणी कपातीच्या पार्श्वभूमीवर नागरिकांनी पाण्याचा काटकसरीने वापर करावा, गळती रोखावी आणि पाणी बचतीच्या उपाययोजना अमलात आणाव्यात, असे आवाहन करण्यात येत आहे.
