टेंभुर्णी | प्रतिनिधी
पत्रकार संतोष भुतेकर यांच्यावर कथित गुटखा माफियांनी केलेल्या भ्याड हल्ल्याच्या निषेधार्थ टेंभुर्णी येथील पत्रकार संघटनांच्या वतीने तीव्र निषेध व्यक्त करण्यात आला. यावेळी टेंभुर्णी पोलीस स्टेशनचे सहाय्यक पोलीस निरीक्षक अविनाश राठोड यांना निवेदन देऊन संबंधित आरोपींवर कठोर कारवाई करण्याची मागणी करण्यात आली.
निवेदनात म्हटले आहे की, अवैध धंद्यांविरोधात बातम्या प्रकाशित करणाऱ्या पत्रकारांवर हल्ले होणे ही अत्यंत गंभीर बाब असून लोकशाहीच्या चौथ्या स्तंभावर होणारा हा थेट आघात आहे. अशा प्रकारच्या गुन्हेगारांविरुद्ध पत्रकार संरक्षण कायद्यानुसार कठोर कारवाई करण्यात यावी, अशी मागणी पत्रकारांनी केली.
यावेळी टेंभुर्णी मराठी पत्रकार संघाच्या वतीने निवेदन सादर करण्यात आले. निवेदन देताना सारथी महाराष्ट्र न्यूजचे पत्रकार शेख गफूर, रावसाहेब उंबरे, सुनील भाले, पी. जी. तांबेकर, शेख नसीम सर, संजय राऊत, गजानन देठे, बी. डी. सावळे, अल्केश सोमानी, बालाजी शेवाळे, साबीर शेख, गजानन शेळके, फकरू कुरेशी, सुनील जोशी, अश्फाक शेख, आशिष पैठणे, शेख इम्रान, शेख अर्षद, भिकन पठाण आदी पत्रकार उपस्थित होते.
पत्रकारांवरील वाढते हल्ले थांबवण्यासाठी प्रशासनाने ठोस पावले उचलावीत व दोषींना कठोर शिक्षा द्यावी, अशी मागणी यावेळी करण्यात आली.
