कळंबोली | प्रतिनिधी
पनवेल महानगरपालिका हद्दीतील कळंबोली येथील सेक्टर ५ परिसरातील मच्छी मार्केटजवळ अवघ्या चार महिन्यांपूर्वी बसविण्यात आलेल्या फुटपाथवरील पेव्हर ब्लॉकची अवस्था अत्यंत दयनीय झाल्याचे समोर आले आहे. नव्याने करण्यात आलेल्या या कामात निकृष्ट दर्जाचे साहित्य वापरण्यात आले का, असा प्रश्न स्थानिक नागरिकांकडून उपस्थित केला जात आहे.
स्थानिकांच्या माहितीनुसार, फुटपाथवरील अनेक पेव्हर ब्लॉक खचले असून काही ठिकाणी ते उखडून गेले आहेत. त्यामुळे पादचाऱ्यांना ये-जा करताना मोठ्या अडचणींचा सामना करावा लागत आहे. विशेषतः ज्येष्ठ नागरिक, महिला आणि लहान मुलांसाठी हा फुटपाथ धोकादायक बनला आहे.
फुटपाथवरील ब्लॉक विस्कळीत झाल्यामुळे गटाराच्या झाकणांजवळ मोठ्या प्रमाणात खड्डे निर्माण झाले आहेत. अवघ्या चार महिन्यांतच विकासकामाची अशी अवस्था झाल्याने कामाच्या दर्जाबाबत गंभीर प्रश्नचिन्ह निर्माण झाले आहे.
नागरिकांनी व्यक्त केलेल्या नाराजीनुसार, सार्वजनिक निधीतून करण्यात आलेल्या विकासकामांची गुणवत्ता दीर्घकाळ टिकून राहणे अपेक्षित असते. मात्र संबंधित ठेकेदार आणि अधिकाऱ्यांच्या कथित दुर्लक्षामुळे नागरिकांचा पैसा वाया जात असल्याची भावना व्यक्त केली जात आहे.
या प्रकरणाची तांत्रिक तपासणी करून कामातील त्रुटींची चौकशी करण्यात यावी, दोषी आढळणाऱ्या संबंधित ठेकेदारांवर योग्य ती कारवाई करावी तसेच फुटपाथची तातडीने दुरुस्ती करण्यात यावी, अशी मागणी स्थानिक नागरिकांनी केली आहे.
दरम्यान, या प्रकरणी पनवेल महानगरपालिका संबंधित कामाची चौकशी करून जबाबदारांवर कारवाई करणार का, याकडे नागरिकांचे लक्ष लागले आहे.
