पनवेल | प्रतिनिधी
सफाई कर्मचाऱ्यांच्या कल्याणासाठी पनवेल महानगरपालिका राबवत असलेले कार्य अभिमानास्पद असून राज्यातील इतर महापालिकांसाठी आदर्शवत आहे. महापालिकेने राबविलेली विविध कल्याणकारी धोरणे आणि उपक्रम इतर स्थानिक स्वराज्य संस्थांनीही अवलंबावेत, असे प्रतिपादन महाराष्ट्र राज्य सफाई कर्मचारी आयोगाचे उपाध्यक्ष मुकेश सारवान यांनी केले.
सफाई कर्मचाऱ्यांच्या विविध प्रश्नांचा आढावा घेण्यासाठी तसेच शासनाच्या कल्याणकारी योजनांच्या अंमलबजावणीची माहिती जाणून घेण्यासाठी मुकेश सारवान यांनी गुरुवार, दि. ४ जून रोजी पनवेल महानगरपालिकेला भेट दिली. यावेळी आयोजित आढावा बैठकीत ते बोलत होते.
बैठकीस महापौर नितीन पाटील, उपमहापौर प्रमिला पाटील, आयुक्त तथा प्रशासक मंगेश चितळे, सभागृह नेते प्रकाश बिनेदार, स्थायी समिती सभापती बाबन मुकादम, परिवहन व्यवस्थापक कैलास गावडे, उपायुक्त डॉ. वैभव विधाते, प्रसेनजित कारलेकर, मंगला माळवे, स्वरूप खारगे, मुख्य वैद्यकीय अधिकारी डॉ. आनंद गोसावी, मुख्य लेखा व वित्त अधिकारी मंगेश गावडे, मुख्य लेखापरीक्षक निलेश नलावडे, सहाय्यक आयुक्त तथा प्रभाग अधिकारी डॉ. रुपाली माने, शहर अभियंता संजय कटेकर तसेच महापालिकेचे अधिकारी, कर्मचारी आणि सफाई कर्मचारी संघटनांचे पदाधिकारी उपस्थित होते.
यावेळी परिवहन व्यवस्थापक कैलास गावडे यांनी शासन निर्णयानुसार वारसाहक्क नियुक्तीच्या प्रकरणांची माहिती देत सफाई कामगारांची मंजूर, भरलेली आणि रिक्त पदे यांचा तपशील सादर केला. तसेच शासनामार्फत राबविण्यात येणाऱ्या विविध कल्याणकारी योजनांची माहितीही दिली.
उपायुक्त डॉ. वैभव विधाते यांनी सफाई कर्मचाऱ्यांसाठी आयोजित प्रशिक्षण कार्यक्रम, आरोग्य तपासणी शिबिरे, विविध स्पर्धा आणि देण्यात येणाऱ्या भत्त्यांबाबत सविस्तर माहिती दिली. तर शहर अभियंता संजय कटेकर यांनी डॉ. बाबासाहेब आंबेडकर श्रमसाफल्य योजनेअंतर्गत २५ वर्षे किंवा त्याहून अधिक सेवा पूर्ण केलेल्या सफाई कामगारांसाठी पंतप्रधान आवास योजनेतून ५४ मोफत मालकी हक्काच्या सदनिकांच्या उपक्रमाची माहिती दिली.
मुकेश सारवान यांनी पनवेल महानगरपालिकेने सफाई कर्मचाऱ्यांच्या सामाजिक, आर्थिक आणि आरोग्यविषयक उन्नतीसाठी राबविलेल्या विविध योजनांचे कौतुक केले. तसेच कर्मचाऱ्यांच्या समस्या प्राधान्याने सोडवून त्यांच्या जीवनमानात सुधारणा घडवून आणण्यासाठी महापालिका सातत्याने प्रयत्नशील असल्याचे त्यांनी नमूद केले.
बैठकीदरम्यान उपस्थित सफाई कर्मचारी संघटनांच्या प्रतिनिधींनीही महापालिकेचे धोरण सकारात्मक व सहकार्यपूर्ण असल्याचे सांगितले. “सफाई कर्मचारी संघटनांकडूनही पालिकेच्या कार्याचे कौतुक होत असेल, तर हे निश्चितच भूषणावह कार्य आहे,” असे समाधानकारक उद्गार मुकेश सारवान यांनी व्यक्त केले.
कार्यक्रमाच्या शेवटी उपायुक्त स्वरूप खारगे यांनी उपस्थितांचे आभार मानले.
