माहूर | प्रतिनिधी
माहूर पोलीस ठाण्याचे पोलीस निरीक्षक देविदास चोपडे यांनी अवैध हातभट्टी दारू निर्मितीविरोधात धडक कारवाई करत मौजे पापलवाडी येथील शेतातील हातभट्टीचा अड्डा उध्वस्त केला. या कारवाईत दारू निर्मितीसाठी तयार करण्यात आलेले सुमारे २५ हजार रुपयांचे रसायन नष्ट करण्यात आले.
नांदेड जिल्ह्यासह माहूर तालुक्यात रोजगाराचा अभाव आणि वाढती व्यसनाधीनता यामुळे हातभट्टी दारूचा व्यवसाय वाढत असल्याचे दिसून येत आहे. यामुळे अनेक कुटुंबांमध्ये वाद निर्माण होत असून सामाजिक समस्या वाढत आहेत. या पार्श्वभूमीवर पोलीस उपमहानिरीक्षक शहाजी उमाप आणि पोलीस अधीक्षक अविनाश कुमार यांच्या मार्गदर्शनाखाली ‘ऑपरेशन फ्लॅश आऊट’ अंतर्गत अवैध दारू निर्मितीविरोधात विशेष मोहीम राबविण्यात येत आहे.
याच मोहिमेअंतर्गत दि. ५ जून रोजी मिळालेल्या गोपनीय माहितीनुसार पोलीस निरीक्षक देविदास चोपडे यांच्या नेतृत्वाखाली पापलवाडी येथील एका शेतातील टीनशेडमध्ये छापा टाकण्यात आला. येथे पाच टाक्यांमध्ये हातभट्टी दारू तयार करण्यासाठी मोहफुलापासून बनविण्यात आलेले रसायन आढळून आले. पोलिसांनी तात्काळ कारवाई करून सुमारे २५ हजार रुपयांचा मुद्देमाल नष्ट केला.
या कारवाईत पोलीस हेड कॉन्स्टेबल ज्ञानोबा खंदाडे, पोलीस कर्मचारी गोपानवाड यांच्यासह अन्य कर्मचाऱ्यांनी सहभाग घेतला. याप्रकरणी एका व्यक्तीविरुद्ध गुन्हा दाखल करण्यात आला आहे.
या धडक कारवाईमुळे तालुक्यातील अवैध हातभट्टी दारू व्यवसाय करणाऱ्यांमध्ये खळबळ उडाली आहे. तसेच अशा प्रकारचे अवैध व्यवसाय सुरू असल्याची माहिती नागरिकांनी पोलिसांना द्यावी, असे आवाहन पोलीस निरीक्षक देविदास चोपडे यांनी केले आहे.
