नाशिक | प्रतिनिधी
नाशिक शहरातील जेलरोड प्रभाग क्रमांक १८ अंतर्गत असलेल्या मनपा शाळा क्रमांक ४९, पंचक येथील जॉगिंग ट्रॅक आणि ग्रीन जिमची दुरवस्था झाल्याने परिसरातील ज्येष्ठ नागरिक व नागरिकांमध्ये तीव्र नाराजी व्यक्त होत आहे.
गेल्या अनेक वर्षांपासून परिसरातील ज्येष्ठ नागरिक, महिला व युवक सकाळी आणि संध्याकाळी शाळेच्या आवारातील जॉगिंग ट्रॅकवर नियमितपणे चालण्यासाठी येतात. तसेच महानगरपालिकेने उभारलेल्या ग्रीन जिममधील विविध व्यायाम साहित्याचाही नागरिकांकडून वापर केला जात होता. मात्र गेल्या काही महिन्यांपासून ग्रीन जिममधील अनेक उपकरणे तुटलेल्या अवस्थेत असून ती वापरण्यायोग्य राहिलेली नाहीत.
यामुळे नियमित व्यायाम करणाऱ्या नागरिकांना तसेच ज्येष्ठ नागरिकांना मोठ्या अडचणींचा सामना करावा लागत आहे. नागरिकांनी वेळोवेळी स्थानिक लोकप्रतिनिधी आणि नगरसेवकांच्या निदर्शनास ही बाब आणून दिली. मात्र अद्यापपर्यंत कोणतीही ठोस कार्यवाही झालेली नसल्याचा आरोप नागरिकांकडून करण्यात येत आहे.
परिसरातील नागरिकांचे म्हणणे आहे की, महानगरपालिका निवडणुकांच्या काळात अनेक आजी-माजी लोकप्रतिनिधी जॉगिंग ट्रॅकवर येऊन नागरिकांच्या समस्या जाणून घेत होते. त्यावेळी ग्रीन जिमची दुरुस्ती, नवीन साहित्य बसविणे आणि जॉगिंग ट्रॅकचे नूतनीकरण करण्याची आश्वासने देण्यात आली होती. मात्र निवडणुका संपल्यानंतर या प्रश्नांकडे दुर्लक्ष झाल्याची भावना नागरिकांनी व्यक्त केली.
काही नागरिकांनी असा आरोपही केला की, परिसरातील इतर उद्यानांमधील सुविधा दुरुस्त करण्यात आल्या असल्या तरी पंचक येथील जॉगिंग ट्रॅक आणि ग्रीन जिमच्या प्रश्नाकडे दुर्लक्ष करण्यात आले आहे.
महानगरपालिका निवडणुका पार पडून महापौर, उपमहापौर तसेच विविध समित्यांची स्थापना होऊनही हा प्रश्न प्रलंबितच असल्याने स्थानिक नागरिकांमध्ये नाराजी वाढत आहे. विशेषतः ज्येष्ठ नागरिकांना सुरक्षित आणि सुस्थितीत चालण्याचा ट्रॅक उपलब्ध नसल्याने त्यांना त्रास सहन करावा लागत आहे.
लवकरात लवकर जॉगिंग ट्रॅकचे डागडुजीकरण करण्यात यावे, ग्रीन जिममधील तुटलेली उपकरणे दुरुस्त करून नवीन साहित्य बसविण्यात यावे आणि नागरिकांच्या आरोग्याशी संबंधित या प्रश्नाकडे तातडीने लक्ष द्यावे, अशी मागणी परिसरातील नागरिकांनी केली आहे.
