चिखली | प्रतिनिधी
पिंगळे रोड परिसरातील नागरिकांच्या मूलभूत सुविधांशी संबंधित विविध समस्यांची दखल घेत नगरसेवक यश उर्फ दत्ताकाका साने यांनी संबंधित विभागांच्या अधिकाऱ्यांसमवेत प्रत्यक्ष पाहणी करून नागरिकांच्या अडचणी जाणून घेतल्या.
परिसरातील विविध सोसायट्यांचे पदाधिकारी आणि नागरिकांनी रस्ते, ड्रेनेज व्यवस्था, पाणीपुरवठा, पथदिवे, स्वच्छता तसेच इतर नागरी समस्यांबाबत सविस्तर माहिती दिली. यानंतर संबंधित विभागांच्या अधिकाऱ्यांना घटनास्थळी बोलावून संयुक्त पाहणी करण्यात आली.
पाहणीदरम्यान नागरिकांनी मांडलेल्या प्रत्येक समस्येची नोंद घेण्यात आली. तसेच तातडीने कार्यवाही करण्याच्या सूचना संबंधित अधिकाऱ्यांना देण्यात आल्या. अनेक वर्षांपासून प्रलंबित असलेल्या मूलभूत सुविधांच्या प्रश्नांचे लवकरात लवकर निराकरण व्हावे यासाठी प्रशासनाकडे सातत्याने पाठपुरावा करण्यात येणार असल्याचे यावेळी सांगण्यात आले.
यावेळी बोलताना नगरसेवक यश (दत्ताकाका) साने म्हणाले, “जनतेच्या समस्या जाणून घेणे, त्या प्रशासनापर्यंत प्रभावीपणे पोहोचवणे आणि त्यांचे निराकरण करून घेणे ही लोकप्रतिनिधी म्हणून माझी प्राथमिक जबाबदारी आहे. पिंगळे रोड परिसरातील प्रत्येक नागरिकाला आवश्यक नागरी सुविधा उपलब्ध करून देण्यासाठी सातत्याने प्रयत्न केले जातील.”
या संयुक्त पाहणी दौऱ्यात स्थानिक नागरिक, सोसायटी पदाधिकारी तसेच संबंधित विभागांचे अधिकारी उपस्थित होते. नगरसेवक दत्ताकाका साने यांच्या पुढाकाराचे नागरिकांनी स्वागत करत परिसरातील प्रलंबित प्रश्न मार्गी लागतील, अशी अपेक्षा व्यक्त केली.
