पाटस (ता. दौंड) | प्रतिनिधी
दौंड तालुक्यातील पाटस येथे व्यावसायिक वादातून गोळीबाराची घटना घडल्याने परिसरात खळबळ उडाली आहे. ही घटना ५ जून २०२६ रोजी दुपारी सुमारे २.३० वाजता यवत पोलीस ठाण्याच्या हद्दीतील राजमाता अहिल्यादेवी होळकर चौकाजवळील गरदडे कॉम्प्लेक्ससमोर घडली.
मिळालेल्या माहितीनुसार, श्री. सिमेंट प्रा. लि., पाटस या कंपनीत वाहन भरण्याच्या कारणावरून संतोष बाळकृष्ण कडू (रा. बेटवाडी, ता. दौंड) आणि सुरज कुन्हाडकर (रा. अंबिकानगर, पाटस) यांच्यात व्यावसायिक वाद निर्माण झाला. या वादातून दोन्ही गटांतील व्यक्ती घटनास्थळी जमा झाल्यानंतर परिस्थिती चिघळली.
यावेळी काही संशयितांनी अग्निशस्त्रातून गोळीबार केल्याची घटना घडली. प्राथमिक माहितीनुसार, या प्रकरणातील काही आरोपींचा संबंध नगर जिल्ह्यातील श्रीगोंदा तालुक्यातील काष्टी व सांगली फाटा मांडवगण परिसराशी असल्याचे सांगितले जात आहे. मात्र, याबाबत पोलीस तपास सुरू आहे.
घटनेनंतर पोलिसांनी तातडीने कारवाई करत आठ जणांना ताब्यात घेतले असून उर्वरित संशयितांचा शोध सुरू आहे. या घटनेत कोणी जखमी झाले आहे का, याबाबत अधिकृत माहिती अद्याप उपलब्ध झालेली नाही.
याप्रकरणी यवत पोलीस ठाण्यात गुन्हा दाखल करण्याची प्रक्रिया सुरू असून पुढील तपास सुरू आहे.
दरम्यान, या घटनेमुळे पाटस परिसरात भीतीचे वातावरण निर्माण झाले आहे. स्थानिक नागरिकांनी वाढत्या गुन्हेगारीबाबत चिंता व्यक्त केली असून परिसरात अधिक प्रभावी पोलीस बंदोबस्त आणि कायदा-सुव्यवस्था मजबूत करण्याची मागणी केली आहे.
