उदगीर | प्रतिनिधी
शिक्षण क्षेत्रात आपल्या कार्याचा अमिट ठसा उमटविणारे ज्येष्ठ शिक्षणतज्ज्ञ कुमार बिरादार यांच्या संघर्षमय जीवनप्रवासावर आधारित ‘सारथी’ या पुस्तकाचे प्रकाशन तसेच त्यांच्या कार्यपूर्ती (सेवानिवृत्ती) निमित्त आयोजित गौरव सोहळा उदगीर येथील कृष्णाई मंगल कार्यालयात उत्साहपूर्ण वातावरणात पार पडला.
कार्यक्रमाच्या अध्यक्षस्थानी माजी नगराध्यक्ष राजेश्वरजी नेटुरे होते. प्रमुख पाहुणे म्हणून खासदार डॉ. शिवाजीराव काळगे, माजी मंत्री तथा आमदार संजयजी बनसोडे, शिक्षक आमदार विक्रमजी काळे, माजी आमदार गोविंद केंद्रे, धनराजजी पांडे यांच्यासह विविध क्षेत्रांतील मान्यवर उपस्थित होते.
कार्यक्रमाच्या प्रारंभी मान्यवरांच्या हस्ते कुमार बिरादार यांच्या जीवनातील संघर्ष, जिद्द, कार्यनिष्ठा आणि यशस्वी शैक्षणिक वाटचालीचा वेध घेणाऱ्या ‘सारथी’ या पुस्तकाचे प्रकाशन करण्यात आले. यानंतर कार्यपूर्ती सोहळ्यानिमित्त कुमार बिरादार व त्यांच्या सौभाग्यवतींचा शाल, श्रीफळ आणि स्मृतिचिन्ह देऊन सत्कार करण्यात आला.
यावेळी गौरव समितीच्या वतीने उपस्थित मान्यवरांचाही सन्मान करण्यात आला. आपल्या मनोगतात अनेक वक्त्यांनी कुमार बिरादार यांच्या शैक्षणिक, सामाजिक आणि मानवतावादी कार्याचा गौरव केला. गोरगरीब, वंचित आणि सर्वसामान्य विद्यार्थ्यांच्या शिक्षणासाठी त्यांनी आयुष्यभर केलेले कार्य प्रेरणादायी असल्याचे मान्यवरांनी नमूद केले.
कुमार बिरादार यांनी आपल्या प्रदीर्घ सेवाकाळात हजारो विद्यार्थ्यांच्या आयुष्याला दिशा देत शिक्षण क्षेत्रात वेगळी ओळख निर्माण केली. त्यांच्या मार्गदर्शनामुळे अनेक विद्यार्थी विविध क्षेत्रांत यशस्वी झाले असून समाजात त्यांनी आदर्श शिक्षक म्हणून स्थान मिळवले आहे.
विद्यार्थी, पालक आणि समाजमनावर त्यांच्या कार्याचा कायमस्वरूपी ठसा उमटला असून त्यांची कार्यपद्धती आणि मूल्याधिष्ठित शिक्षणाची भूमिका भावी पिढ्यांसाठी मार्गदर्शक ठरेल, अशा भावना उपस्थित मान्यवरांनी व्यक्त केल्या.
या सोहळ्यास शिक्षक, सामाजिक कार्यकर्ते, माजी विद्यार्थी, मित्रपरिवार तसेच नागरिक मोठ्या संख्येने उपस्थित होते. कुमार बिरादार यांच्या कार्याचा गौरव करणारा हा कार्यक्रम अत्यंत भावनिक, प्रेरणादायी आणि संस्मरणीय ठरला.
