खटाव प्रतिनिधी
खटाव तालुक्यात बेकायदेशीर गुटखा, विमल पानमसाला आणि इतर प्रतिबंधित तंबाखूजन्य पदार्थांची विक्री व वाहतूक मोठ्या प्रमाणावर सुरू असल्याचा आरोप नागरिकांकडून करण्यात येत आहे. तालुक्यातील विविध गावांमध्ये अवैधरित्या पानमसाल्याचा साठा पोहोचवला जात असून त्याची खुलेआम विक्री होत असल्याची चर्चा आहे.
स्थानिकांच्या म्हणण्यानुसार, अनेक दिवसांपासून हा अवैध व्यवसाय सुरू असून संबंधित यंत्रणांकडून अपेक्षित कारवाई होत नसल्याने नागरिकांमध्ये नाराजी व्यक्त होत आहे. बेकायदेशीररित्या वाहतूक करून विविध गावांमध्ये गुटखा व पानमसाला पोहोचवला जात असल्याचा आरोपही करण्यात येत आहे.
तंबाखूजन्य पदार्थांच्या वाढत्या वापरामुळे युवकांच्या आरोग्यावर गंभीर परिणाम होत असल्याने प्रशासनाने या प्रकाराकडे गांभीर्याने लक्ष देण्याची गरज असल्याचे नागरिकांचे मत आहे. संबंधित विभागांनी तालुक्यातील संशयित ठिकाणी छापेमारी करून अवैध साठा जप्त करावा तसेच दोषींवर कठोर कारवाई करावी, अशी मागणी होत आहे.
खटाव तालुक्यात सुरू असलेल्या बेकायदेशीर धंद्यांना आळा घालण्यासाठी अन्न व औषध प्रशासन, पोलीस विभाग आणि महसूल प्रशासनाने संयुक्त कारवाई करावी, अशी अपेक्षा नागरिकांनी व्यक्त केली आहे. शासनाने तातडीने दखल घेऊन या अवैध व्यवसायावर कठोर निर्बंध आणावेत, अशी मागणी जोर धरत आहे.
