श्रीरामपूर | प्रतिनिधी
श्रीरामपूर शहरातील नेवासा रोडवरील साखर कामगार रुग्णालयासमोर शनिवारी रात्री साडेनऊच्या सुमारास एका युवकावर अज्ञात हल्लेखोरांनी प्राणघातक हल्ला केल्याची घटना घडली. चायनीज खाद्यपदार्थांच्या गाडीजवळ उभ्या असलेल्या युवकावर अचानक चॉपरने वार करण्यात आल्याने परिसरात खळबळ उडाली.
या हल्ल्यात ननवरे आडनावाच्या युवकाच्या मांडीला गंभीर दुखापत झाली असल्याचे समजते. घटनेनंतर उपस्थित नागरिकांनी जखमी युवकाला तातडीने साखर कामगार रुग्णालयात दाखल केले. तेथे प्राथमिक उपचार करण्यात आल्यानंतर पुढील उपचारासाठी त्याला लोणी येथील प्रवरा रुग्णालय येथे हलविण्यात आले.
रुग्णालयातील वैद्यकीय अधिकाऱ्यांनी जखमीवर प्राथमिक उपचार करून त्याची प्रकृती लक्षात घेता पुढील उपचारासाठी रेफर केल्याची माहिती दिली.
दरम्यान, श्रीरामपूर शहरात गुन्हेगारीच्या घटनांमध्ये वाढ होत असल्याची चर्चा सुरू आहे. दोन दिवसांपूर्वी रेल्वे स्थानकासमोर एका युवकाच्या मानेवर चाकूने हल्ला करण्यात आला होता. त्या प्रकरणात दोन अल्पवयीन आरोपींचा समावेश असल्याची माहिती समोर आली होती.
या ताज्या घटनेमुळे शहरातील कायदा व सुव्यवस्थेबाबत चिंता व्यक्त केली जात असून, हल्लेखोरांचा शोध घेण्यासाठी पोलिसांकडून तपास सुरू असल्याची माहिती मिळाली आहे.
