नळदुर्ग | प्रतिनिधी
नळदुर्ग येथील फिनिक्स जी-चॅम्प अबॅकस अँड कोचिंग क्लासेसच्या विद्यार्थ्यांनी भाग्यनगर (हैदराबाद) येथे आयोजित करण्यात आलेल्या इंटरनॅशनल अबॅकस स्पर्धेत उल्लेखनीय यश संपादन करत नळदुर्गच्या शैक्षणिक क्षेत्राचा मान उंचावला आहे.
या स्पर्धेत प्रेम प्रतापसिंग हजारे याने सलग तिसऱ्यांदा अबॅकस चॅम्पियन होण्याचा मान मिळवला. तसेच आस्तिक सतीश खांडेकर आणि शशांक संतोष धोत्रे यांनी उत्कृष्ट कामगिरी करत इंटरनॅशनल अबॅकस कॉम्पिटिशन विनर म्हणून यश संपादन केले.
प्रेम हजारे याने राज्यस्तरीय, राष्ट्रीयस्तरीय आणि आंतरराष्ट्रीय स्तरावरील स्पर्धांमध्ये सातत्यपूर्ण सहभाग नोंदवत यशाची नवी उंची गाठली आहे. आपल्या जिद्द, मेहनत आणि योग्य मार्गदर्शनाच्या जोरावर त्याने आंतरराष्ट्रीय स्पर्धेत द्वितीय क्रमांक मिळवत चॅम्पियन होण्याचा बहुमान पटकावला.
या यशामागे फिनिक्स जी-चॅम्प अबॅकस अँड कोचिंग क्लासेसचे संस्थापक सुरज संभाजी कांबळे यांचे मोलाचे मार्गदर्शन लाभले. विद्यार्थ्यांना दिलेल्या उत्कृष्ट प्रशिक्षणाची दखल घेत त्यांना सलग चौथ्यांदा “बेस्ट इंटरनॅशनल अबॅकस टीचर अवॉर्ड” प्रदान करण्यात आला. या दुहेरी यशामुळे विद्यार्थी, पालक आणि शिक्षकांमध्ये आनंदाचे वातावरण निर्माण झाले आहे.
यावेळी प्रेम प्रतापसिंग हजारे म्हणाला, “फिनिक्स जी-चॅम्प अबॅकस क्लासमुळे माझा आत्मविश्वास, एकाग्रता आणि गणिती कौशल्ये विकसित झाली. सुरज कांबळे सरांचे मार्गदर्शन, प्रेरणा आणि सातत्यपूर्ण मेहनतीमुळे मला हे यश मिळाले. प्रत्येक विद्यार्थ्याने मोठी स्वप्ने पाहून त्यासाठी सातत्याने प्रयत्न केले तर यश निश्चित मिळते.”
प्रेम हजारे यांचे वडील प्रतापसिंग हजारे यांनी भावना व्यक्त करताना सांगितले की, “फिनिक्स जी-चॅम्प अबॅकस क्लास विद्यार्थ्यांच्या सर्वांगीण विकासासाठी कार्य करणारी उत्कृष्ट संस्था आहे. सुरज कांबळे सर विद्यार्थ्यांमध्ये आत्मविश्वास, शिस्त आणि स्पर्धात्मकता निर्माण करण्यासाठी सातत्याने प्रयत्न करतात. त्यांच्या मार्गदर्शनामुळे माझ्या मुलाला आंतरराष्ट्रीय स्तरावर यश मिळाले, याचा आम्हाला अभिमान वाटतो.”
फिनिक्स जी-चॅम्प अबॅकस अँड कोचिंग क्लासेसच्या माध्यमातून नळदुर्गमध्ये गुणवत्तापूर्ण शैक्षणिक वातावरण निर्माण होत असून येथील विद्यार्थी राज्य, राष्ट्रीय आणि आंतरराष्ट्रीय स्तरावर सातत्याने यश मिळवत आहेत. विद्यार्थ्यांच्या या उल्लेखनीय कामगिरीमुळे नळदुर्गचे नाव देशभरात गौरवाने घेतले जात असून सर्व स्तरांतून त्यांचे अभिनंदन होत आहे.
