मोरगाव | प्रतिनिधी
मोरगाव राज्यमार्गावरील चौधरवाडी फाटा येथे शनिवारी (दि. ६ जून) सायंकाळी साडेचारच्या सुमारास झालेल्या भीषण अपघातात दोन अल्पवयीन बहिणींचा जागीच मृत्यू झाला, तर त्यांचा लहान भाऊ गंभीर जखमी झाला आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, इलेक्ट्रिक स्कूटी आणि आयशर टेम्पो (क्र. डीडी ०१ जी ९३४३) यांच्यात समोरासमोर जोरदार धडक झाली. धडक इतकी भीषण होती की स्कूटीचा अक्षरशः चक्काचूर झाला.
या अपघातात अक्षदा ज्ञानेश्वर बोडरे (वय १७) आणि सेजल ज्ञानेश्वर बोडरे (वय १५, रा. मुरूम, ता. फलटण, जि. सातारा) यांचा घटनास्थळीच मृत्यू झाला. तर त्यांचा लहान भाऊ पवन ज्ञानेश्वर बोडरे (वय ९) गंभीर जखमी असून त्याच्यावर बारामती येथील खासगी रुग्णालयात उपचार सुरू आहेत.
अपघातानंतर परिसरातील नागरिकांनी मदतकार्य सुरू केले. काही काळ या मार्गावरील वाहतूक विस्कळीत झाली होती. घटनेची माहिती मिळताच वडगाव निंबाळकर पोलीस घटनास्थळी दाखल झाले असून टेम्पो चालकाला ताब्यात घेण्यात आले आहे.
या दुर्दैवी घटनेमुळे बोडरे कुटुंबावर दुःखाचा डोंगर कोसळला असून परिसरात शोककळा पसरली आहे.
