पातूर
हवामान विभागाने यंदा सरासरीपेक्षा कमी पाऊस पडण्याचा अंदाज वर्तवल्याने पातूर परिसरातील शेतकरी वर्गामध्ये मोठी चिंता निर्माण झाली आहे. मागील काही वर्षांतील अस्मानी संकटांनंतर आता पुन्हा दुष्काळसदृश परिस्थिती निर्माण होण्याची भीती व्यक्त केली जात आहे.
दरवर्षी जूनच्या सुरुवातीला सुरू होणारी खरिप हंगामाची तयारी यंदा मंदावली आहे. पावसाच्या अनिश्चिततेमुळे शेतकऱ्यांनी बियाणे आणि खते खरेदी थांबवली असून, दुबार पेरणीचे संकट उद्भवण्याची भीती शेतकरी व्यक्त करत आहेत.
पातूर ग्रामीण भागात सध्या विहिरी आणि कूपनलिकांच्या पाणीपातळीत लक्षणीय घट दिसून येत आहे. पाऊस कमी झाल्यास पिण्याच्या पाण्याचा प्रश्न गंभीर होण्याची शक्यता वर्तवली जात आहे. तसेच जनावरांच्या चाऱ्याची टंचाई निर्माण होण्याची भीती पशुपालकांकडून व्यक्त केली जात आहे.
अनेक शेतकऱ्यांनी खरीप हंगामासाठी बँक व खासगी कर्ज घेतले असून, पाऊस न झाल्यास पीक उत्पादनावर मोठा परिणाम होऊ शकतो. त्यामुळे कर्ज परतफेडीचा प्रश्न निर्माण होण्याची शक्यता शेतकरी वर्गाला भेडसावत आहे.
या पार्श्वभूमीवर शासनाने परिस्थितीवर लक्ष ठेवून शेतकऱ्यांना तातडीने दिलासा द्यावा, अशी मागणी ग्रामीण भागातून होत आहे. हवामानातील बदल लक्षात घेऊन पुढील नियोजन करण्याची गरजही शेतकरी व्यक्त करत आहेत.
