कन्नड | प्रतिनिधी
कन्नड तालुक्यातील तेलवाडी येथील लक्ष्मण चैतन्य महाराज यांच्या आश्रमात भला मोठा अजगर आढळल्याने काही काळ परिसरात खळबळ उडाली. आश्रमातील धान्याच्या पोत्यांजवळ हा अजगर दिसताच लक्ष्मण चैतन्य महाराज यांनी तत्काळ कन्नड येथील सर्पमित्र अनिल शिरसे यांच्याशी संपर्क साधला.
माहिती मिळताच सर्पमित्र अनिल शिरसे घटनास्थळी दाखल झाले आणि त्यांनी अत्यंत काळजीपूर्वक अजगराला सुरक्षितरीत्या पकडले. यानंतर परिसरातील नागरिकांनी सुटकेचा निःश्वास सोडला.
यावेळी सर्पमित्र अनिल शिरसे यांनी सांगितले की, हा साप बिनविषारी असून त्याला ‘इंडियन रॉक पायथन’ (Indian Rock Python) असे म्हटले जाते. हा साप पर्यावरणाच्या दृष्टीने महत्त्वाचा असून तो उंदीर व इतर लहान प्राण्यांवर उपजीविका करतो.
सध्या सापांच्या प्रजननाचा काळ सुरू असल्याने अनेक साप आपल्या बिळातून बाहेर पडतात. भक्ष्याच्या शोधात हा अजगर आश्रम परिसरात आला असावा, असा अंदाज त्यांनी व्यक्त केला.
सर्पमित्रांनी नागरिकांना आवाहन केले की, साप आढळल्यास घाबरून जाऊ नये किंवा त्याला इजा करू नये. तत्काळ सर्पमित्र किंवा वनविभागाशी संपर्क साधून सापाचे सुरक्षित रेस्क्यू करून घ्यावे.
या घटनेमुळे आश्रम परिसरात काही काळ उत्सुकतेचे वातावरण निर्माण झाले होते.
