कन्नड | प्रतिनिधी
जागतिक पर्यावरण दिनानिमित्त कन्नड नगरपालिकेच्या वतीने छत्रपती शिवाजी महाराज उद्यान येथे वृक्षारोपण कार्यक्रम उत्साहात पार पडला. नगराध्यक्ष फरीन बेगम अब्दुल जावेद सेठ यांच्या हस्ते वृक्षारोपण करून पर्यावरण संवर्धनाचा संदेश देण्यात आला.
यावेळी नगराध्यक्ष फरीन बेगम अब्दुल जावेद सेठ यांनी उपस्थितांना मार्गदर्शन करताना, “झाडे ही पृथ्वीची खरी अलंकार आहेत. पर्यावरणाचा समतोल राखण्यासाठी वृक्षारोपणासोबतच त्यांचे संगोपन करणेही तितकेच महत्त्वाचे आहे. प्रत्येक नागरिकाने ‘झाडे लावा, झाडे जगवा’ हा संकल्प अंगीकारला पाहिजे,” असे आवाहन केले.
कार्यक्रमादरम्यान अनेक नागरिकांनी उत्स्फूर्तपणे सहभाग घेत विविध प्रकारच्या वृक्षांची लागवड केली. पर्यावरण संरक्षण आणि हरित कन्नड घडविण्याच्या उद्देशाने आयोजित करण्यात आलेल्या या उपक्रमाला नागरिकांचा चांगला प्रतिसाद मिळाला.
या कार्यक्रमास कन्नड नगर परिषदेचे मुख्याधिकारी लांडे साहेब, डॉ. सदाशिव पाटील, अय्यास शहा, भैय्या मेंबर, अजीजभाई, शिवकुमार जैस्वाल, तारक सेठ, राजा भैया, गोकुळ राठोड, विजय शिरसाठ, श्रीमती बेडगे, वैशाली दाभाडे, शेजुळ मॅडम तसेच मोठ्या संख्येने नागरिक उपस्थित होते.
पर्यावरण संवर्धनासाठी वृक्षारोपणासारखे उपक्रम सातत्याने राबविण्याची गरज असल्याचे मत उपस्थितांनी व्यक्त केले. या उपक्रमामुळे पर्यावरण संरक्षणाबाबत जनजागृती होण्यास मदत झाली असून नागरिकांमध्ये हरित वातावरण निर्मितीचा संदेश पोहोचला.
