कुरुंदवाड | प्रतिनिधी :
शिरोळ तालुक्यातील कुरुंदवाड येथे हजरत दौलत शहावली बाबा दर्ग्याचा वार्षिक उरूस गुरुवारी मोठ्या भक्तीभाव आणि उत्साहात संपन्न झाला. हिंदू-मुस्लिम ऐक्याचे प्रतीक मानल्या जाणाऱ्या या उरूसाला परिसरातील हजारो भाविकांनी उपस्थित राहून दर्शनाचा लाभ घेतला.
उरूसानिमित्त दर्गा परिसराची आकर्षक सजावट करण्यात आली होती. दर्गा व मजार परिसराला रंगरंगोटी करण्यात आली असून हिरव्या पताका, विद्युत रोषणाई आणि ध्वनीव्यवस्थेमुळे संपूर्ण परिसर भक्तिमय वातावरणाने नटला होता.
हजरत दौलत शहावली बाबा दर्गा हे कुरुंदवाड आणि परिसरातील नागरिकांचे श्रद्धास्थान असून येथे हिंदू आणि मुस्लिम समाजातील भाविक मोठ्या श्रद्धेने दर्शनासाठी येतात. सामाजिक सलोखा आणि धार्मिक सौहार्द जपणारे हे ठिकाण म्हणून दर्ग्याची ओळख आहे.
उरूसाच्या पूर्वसंध्येला १० जून रोजी संदल कार्यक्रम पार पडला. कुरुंदवाडचे माजी नगराध्यक्ष रावसाहेब उर्फ दा. आ. पाटील यांच्या निवासस्थानातून मानाचा संदल वाजतगाजत दर्ग्याकडे नेण्यात आला. गालिफा चढविण्याचा मान कुरुंदवाड पोलीस ठाण्याला देण्यात आला. यावेळी सहाय्यक पोलीस निरीक्षक संतोष माने, पोलीस निरीक्षक जीवन पाटील आणि पोलीस कर्मचाऱ्यांनी गालिफा मिरवणुकीत सहभाग घेतला.
या दर्ग्याचे वैशिष्ट्य म्हणजे उरूसादरम्यान मांसाहार पूर्णपणे वर्ज्य ठेवला जातो. भाविकांना शुद्ध शाकाहारी मलिदा-भात आणि साखरेचा नैवेद्य प्रसाद म्हणून वितरित केला जातो.
उरूसानिमित्त मार्केट कमिटीतील हर्षद बागवान, शब्बीर बागवान आणि बागवान व्यापारी बांधवांच्या वतीने हिंदू-मुस्लिम भाविकांसाठी महाप्रसादाचे आयोजन करण्यात आले होते. रात्री कव्वालीच्या सवाल-जवाबाचा बहारदार सांस्कृतिक कार्यक्रम रंगला.
दर्गा परिसरात भारतीय शास्त्रीय संगीत क्षेत्रातील प्रख्यात गायक उस्ताद रहिमत खाँ यांची मजारही असून त्यामुळे या स्थळाला धार्मिकतेबरोबरच ऐतिहासिक आणि सांगीतिक महत्त्व प्राप्त झाले आहे. कुरुंदवाड हे पटवर्धन संस्थानाच्या काळापासून संगीत परंपरेसाठी प्रसिद्ध राहिले आहे.
दर गुरुवारी येथे हिंदू-मुस्लिम भाविक साखर व उद अर्पण करून प्रदक्षिणा घालतात आणि दर्शन घेतात. धार्मिक सलोखा आणि परस्पर श्रद्धेचे दर्शन घडविणारा हा उरूस परिसरातील ऐक्याचा संदेश देणारा ठरला.
उरूस यशस्वी करण्यासाठी हजरत दौलत शहावली बाबा दर्गा ट्रस्टचे चेअरमन युनूस अब्दुल मुल्ला, विश्वस्त हाजी गौस लाजम मुल्ला, बापुसो मुल्ला, तन्वीर मुल्ला, मीरासो मुल्ला, मस्जिद मुल्ला, सद्दाम मुल्ला, मुस्तफा मुल्ला, शब्बीर बाबालाल मुल्ला आदींनी विशेष परिश्रम घेतले.
