२०० मीटर नो-पार्किंग क्षेत्राची प्रभावी अंमलबजावणी; वाहनचालकांना नियमांचे मार्गदर्शन
किनवट | दि. १० जून २०२६
राज्य परिवहन महामंडळाच्या महसूलात वाढ करणे, अवैध प्रवासी वाहतुकीस आळा घालणे आणि प्रवाशांना सुरक्षित व नियमित वाहतूक सेवा उपलब्ध करून देण्याच्या उद्देशाने नांदेड विभागाच्या वतीने किनवट बसस्थानक परिसरात विशेष धडक मोहीम राबविण्यात आली.
या मोहिमेंतर्गत बसस्थानकापासून २०० मीटरपर्यंतच्या परिसरात नो-पार्किंग झोन तसेच अवैध खाजगी प्रवासी वाहतूक प्रतिबंधक नियमांची प्रभावी अंमलबजावणी करण्यात आली. दि. १० जून रोजी झालेल्या या कारवाईत मोटार वाहन निरीक्षक निलेश पवार, सहाय्यक मोटार वाहन निरीक्षक संघपाल कदम, सहाय्यक सुरक्षा निरीक्षक भागोराव वागतकर, चालक विश्वनाथ बोराटे, किनवट आगाराचे सहाय्यक वाहतूक अधीक्षक शिलरत्न ढगे, वाहतूक निरीक्षक साईनाथ मुंडे तसेच सहाय्यक वाहतूक निरीक्षक गंगय्या सटलावार यांच्यासह राज्य परिवहन मार्ग वाहतूक कर्मचाऱ्यांनी सहभाग घेतला.
कारवाईदरम्यान बसस्थानक परिसरातील २०० मीटरच्या हद्दीत उभ्या असलेल्या तसेच प्रवासी वाहतुकीसाठी अनधिकृतपणे वापरल्या जाणाऱ्या वाहनांची तपासणी करण्यात आली. नियमांचे उल्लंघन करणारी अनेक वाहने बसस्थानकाच्या हद्दीबाहेर हलविण्यात आली. त्यामुळे बसस्थानक परिसरातील वाहतूक अधिक सुरळीत होण्यास मदत झाली असून प्रवाशांना सुरक्षित वातावरण उपलब्ध झाले आहे.
अधिकाऱ्यांनी यावेळी खाजगी वाहनचालकांशी संवाद साधत अवैध प्रवासी वाहतुकीमुळे होणारे कायदेशीर परिणाम, मोटार वाहन कायद्यातील तरतुदी तसेच राज्य परिवहन महामंडळाच्या महसूलावर होणारा परिणाम याबाबत सविस्तर मार्गदर्शन केले. भविष्यात नियमांचे उल्लंघन केल्यास दंडात्मक आणि कायदेशीर कारवाई करण्यात येईल, असा इशाराही देण्यात आला.
राज्याचे परिवहन मंत्री तसेच परिवहन महामंडळाच्या सुरक्षा व दक्षता विभागाच्या निर्देशानुसार नांदेड विभागात अवैध प्रवासी वाहतुकीविरोधात विशेष अभियान सुरू असून त्याचाच एक भाग म्हणून किनवट येथे ही कारवाई करण्यात आली.
बसस्थानक परिसरातून अनधिकृतपणे प्रवासी उचलणाऱ्या वाहनांमुळे एसटी महामंडळाच्या उत्पन्नावर परिणाम होत असल्याबरोबरच प्रवाशांच्या सुरक्षिततेचाही प्रश्न निर्माण होत असल्याने अशा वाहनांवर सातत्याने लक्ष ठेवले जाणार असल्याचे अधिकाऱ्यांनी स्पष्ट केले.
या मोहिमेमुळे बसस्थानक परिसरातील अनधिकृत वाहतुकीवर नियंत्रण मिळविण्यास मदत होणार असून एसटीच्या अधिकृत सेवेला चालना मिळेल, असा विश्वास परिवहन विभागाने व्यक्त केला आहे. आगामी काळातही अशा प्रकारच्या तपासणी आणि अंमलबजावणी मोहिमा नियमितपणे राबविण्यात येणार आहेत.
