बीड | प्रतिनिधी
चकलांबा पोलीस ठाणे हद्दीतील ब्रह्मगाव येथे दोन समाजांमध्ये तेढ निर्माण करण्याच्या उद्देशाने बजरंग बलीच्या मूर्तीची विटंबना केल्याप्रकरणी आरोपीला स्थानिक गुन्हे शाखेच्या पथकाने अटक केली आहे.
काही दिवसांपूर्वी ब्रह्मगाव येथील पुरातन बजरंग बली मंदिरातील मूर्तीवर अज्ञात व्यक्तीने मांस टाकल्याची घटना घडली होती. या प्रकारामुळे हिंदू समाजाच्या भावना दुखावल्या गेल्याने गावात तणावपूर्ण शांतता निर्माण झाली होती. घटनेनंतर पोलीस प्रशासनाने आरोपीचा शोध घेण्यासाठी विशेष तपास सुरू केला होता.
या गुन्ह्याचा तपास स्थानिक गुन्हे शाखेचे पोलीस उपनिरीक्षक खटावकर यांच्याकडे सोपविण्यात आला होता. तांत्रिक माहिती आणि गुप्त बातमीदारांकडून मिळालेल्या माहितीच्या आधारे पोलिसांनी पेंडगाव परिसरात सापळा रचून आरोपी नासेरखा बालेखा पठाण (वय ५५) याला ताब्यात घेतले. तपासादरम्यान आरोपी अहमदनगर, बीड आणि इतर भागांत वेगवेगळ्या मार्गाने फिरत असल्याची माहिती समोर आली.
ही कारवाई चेतना तिडके, समीर शेख, अनिल कडके आणि शिवाजी बंटेवाड यांच्या मार्गदर्शनाखाली करण्यात आली.
कारवाईत पोलीस उपनिरीक्षक खटावकर यांच्यासह गोविंद राख, अर्जुन यादव, विकास राठोड, अंकुश वरपे, इनूस बागवान, अलिम शेख आणि चालक नितीन वडमारे यांच्या पथकाचा सहभाग होता.
या प्रकरणातील पुढील तपास सुरू असून आरोपीविरुद्ध कायदेशीर कारवाई करण्यात येत आहे. घटनेमुळे निर्माण झालेला तणाव कमी करण्यासाठी पोलीस प्रशासन परिस्थितीवर बारकाईने लक्ष ठेवून आहे.
