कळंबोली | प्रतिनिधी :
खारघर आणि कळंबोली परिसरात वारंवार उद्भवणाऱ्या वीजपुरवठा खंडितीच्या समस्येमुळे नागरिकांना मोठ्या अडचणींचा सामना करावा लागत असताना, महाराष्ट्र राज्य वीज वितरण कंपनी मर्यादित (महावितरण) ने ग्राहकांसाठी महत्त्वाचे पाऊल उचलले आहे. वीज तक्रारींचे जलद निराकरण आणि वीजभारातील चढ-उतारांवर सातत्याने लक्ष ठेवण्यासाठी २४ तास कार्यरत राहणारा नियंत्रण कक्ष (Control Room) सुरू करण्यात आला आहे.
महावितरणच्या खारघर-कळंबोली देखभाल व दुरुस्ती उपविभागाकडून यासंदर्भात आदेश जारी करण्यात आले असून, नागरिकांना वीजपुरवठ्याबाबत कोणतीही अडचण, तक्रार किंवा माहिती हवी असल्यास थेट नियंत्रण कक्षाशी संपर्क साधता येणार आहे.
नियंत्रण कक्ष संपर्क क्रमांक :
- खारघर मुख्य नियंत्रण कक्ष : 8879622401
- कळंबोली मुख्य नियंत्रण कक्ष : 8879622171
महावितरणच्या माहितीनुसार, नियंत्रण कक्षात दिवस-रात्र दोन शिफ्टमध्ये कर्मचारी कार्यरत राहणार आहेत. प्राप्त होणाऱ्या तक्रारींची तात्काळ नोंद घेऊन त्या संबंधित विभागांकडे पाठविल्या जातील. तसेच समस्यांचे शक्य तितक्या कमी वेळेत निराकरण करण्यासाठी विशेष यंत्रणा कार्यरत राहणार आहे.
वीजपुरवठ्याशी संबंधित कोणतीही समस्या उद्भवल्यास नागरिकांनी संबंधित शाखा कार्यालय किंवा नियंत्रण कक्षाशी संपर्क साधावा, असे आवाहन महावितरणकडून करण्यात आले आहे.
या उपक्रमामुळे तक्रार नोंदविण्याची प्रक्रिया अधिक सुलभ होणार असून ग्राहकांना तत्पर सेवा मिळण्यास मदत होईल, असा विश्वास व्यक्त करण्यात आला आहे. महावितरणच्या या निर्णयामुळे खारघर आणि कळंबोली परिसरातील वीज ग्राहकांना थेट संपर्काची सुविधा उपलब्ध झाली असून तक्रारींच्या जलद निवारणासाठी प्रशासन सज्ज असल्याचे स्पष्ट झाले आहे.
