नेर | प्रतिनिधी
कृषी विभागामार्फत राबविण्यात येत असलेल्या १०० टक्के अनुदानावरील सोयाबीन बियाणे वितरण योजनेला नेर तालुक्यातील शेतकऱ्यांचा उत्स्फूर्त प्रतिसाद मिळत आहे. खरीप हंगाम तोंडावर आला असताना दर्जेदार सोयाबीन बियाणे मोफत उपलब्ध होत असल्याने शेतकऱ्यांमध्ये आनंदाचे वातावरण निर्माण झाले आहे.
तालुक्यातील चार कृषी केंद्रांवर सोमवारी सोयाबीन बियाण्यांचे वितरण करण्यात आले. बियाणे मिळवण्यासाठी सकाळपासूनच शेतकऱ्यांनी कृषी केंद्रांवर मोठी गर्दी केली होती. कृषी विभागाच्या या उपक्रमामुळे शेतकऱ्यांना आर्थिक दिलासा मिळत असून, आगामी खरीप हंगामासाठी तयारीला वेग आला आहे
कृषी विभागाकडून मिळालेल्या माहितीनुसार, आतापर्यंत सुमारे ८० टक्के पात्र शेतकऱ्यांनी या योजनेचा लाभ घेतला आहे. उर्वरित शेतकऱ्यांनाही लवकरात लवकर बियाण्यांचे वितरण पूर्ण करण्यात येणार असल्याचे संबंधित अधिकाऱ्यांनी सांगितले.
या योजनेमुळे शेतकऱ्यांचा उत्पादन खर्च कमी होण्यास मदत होणार असून, दर्जेदार बियाण्यांच्या वापरामुळे उत्पादन वाढीसही चालना मिळेल, अशी अपेक्षा व्यक्त केली जात आहे. कृषी विभागाच्या या उपक्रमाचे तालुक्यातील शेतकऱ्यांकडून स्वागत करण्यात येत आहे.
