अक्कलकोट | प्रतिनिधी
अक्कलकोट तालुक्यातील शिरवळ हे छोटेसे गाव असले तरी येथील श्री पंचलिंगेश्वर हायस्कूलने अनेक विद्यार्थ्यांना घडवले आहे. या शाळेचे विद्यमान मुख्याध्यापक तथा ज्येष्ठ शिक्षक अशोक कलशेट्टी सर यांनी विद्यार्थ्यांमध्ये शिक्षणाबरोबरच पर्यावरण संवर्धनाची जाणीव रुजविण्याचे मोलाचे कार्य केले आहे.
शाळेत आठवी ते दहावीच्या काळात विज्ञान विषय शिकवणारे कलशेट्टी सर झाडांबाबत विशेष जागरूक होते. शाळेच्या परिसरात लावलेल्या झाडांची जपणूक करण्यासाठी ते विद्यार्थ्यांना सातत्याने मार्गदर्शन करत असत. त्यावेळी अनेक विद्यार्थ्यांना त्यांची ही शिस्त आणि झाडांबाबतची काळजी कदाचित कठोर वाटत असे.
मात्र, काळाच्या ओघात त्या झाडांचे महत्त्व आणि पर्यावरणासाठीचे योगदान लक्षात आल्यानंतर माजी विद्यार्थ्यांमध्ये सरांविषयीचा आदर अधिकच वाढला आहे. आज तीच झाडे परिसराला हिरवाई देत असून शुद्ध हवा आणि ऑक्सिजनचा स्रोत ठरत आहेत.
सारथी महाराष्ट्राचे सोलापूर जिल्हा प्रतिनिधी तथा शाळेचे माजी विद्यार्थी चंद्रकांत गायकवाड यांनी आपल्या भावना व्यक्त करताना सांगितले की, “कलशेट्टी सरांनी आम्हाला झाडे लावण्याची आणि त्यांचे संगोपन करण्याची शिकवण दिली. त्यावेळी त्याचे महत्त्व पूर्णपणे समजले नव्हते, परंतु आज त्यांच्या कार्याचे मोल जाणवत आहे. त्यांच्याबद्दल कितीही आभार मानले तरी ते कमीच आहेत.”
पर्यावरण संवर्धनाचा संदेश देत प्रत्येक विद्यार्थ्याने किमान एक झाड लावावे आणि त्याची काळजी घ्यावी, हा कलशेट्टी सरांचा संदेश आजही विद्यार्थ्यांसाठी प्रेरणादायी ठरत आहे. त्यांच्या या कार्याबद्दल माजी विद्यार्थ्यांकडून कृतज्ञता व्यक्त करण्यात येत आहे.
