नेर | प्रतिनिधी
नेर-अमरावती राज्य महामार्गावरील दोडकीजवळील खंडाळा फाटा परिसरात शुक्रवारी सकाळी प्रवासी टेम्पो ट्रॅव्हल आणि मालवाहू आयशर वाहनाची समोरासमोर धडक होऊन भीषण अपघात झाला. या अपघातात टेम्पो ट्रॅव्हल चालकाचा जागीच मृत्यू झाला असून चार जण जखमी झाले आहेत.
मृत चालकाचे नाव रमेश चितोडिया (वय ३०) असे आहे. तर कविता चितोडिया (वय २५), वैजयंती चितोडिया (वय १९), मुनाफ खान (वय ६०, रा. नेर) आणि रशीद शहा (वय ४०, रा. अजंती खाकी) हे जखमी झाले असून त्यांना पुढील उपचारासाठी यवतमाळ येथील रुग्णालयात दाखल करण्यात आले आहे.
मिळालेल्या माहितीनुसार, एमपी ०९ बीए ५५८७ क्रमांकाचा टेम्पो ट्रॅव्हल मोर्शीहून नेरकडे येत होता. या वाहनातून जडीबुटी व्यवसाय करणारे चितोडिया कुटुंब प्रवास करत होते. त्याचवेळी एमएच २७ एक्स ८४५३ क्रमांकाचे आयशर मालवाहू वाहन तेलाची पिपे घेऊन नेर-अमरावती मार्गावर जात होते.
खंडाळा फाट्याजवळ टेम्पो ट्रॅव्हल चालकाचे वाहनावरील नियंत्रण सुटल्याने ते थेट आयशर वाहनावर जाऊन आदळले. धडक इतकी भीषण होती की टेम्पो ट्रॅव्हलच्या पुढील भागाचा अक्षरशः चेंदामेंदा झाला. तसेच आयशर वाहनाचेही मोठे नुकसान झाले.
अपघाताची माहिती मिळताच परिसरातील नागरिकांनी घटनास्थळी धाव घेऊन जखमींना मदत केली. काही काळ महामार्गावरील वाहतूक विस्कळीत झाली होती. घटनेची माहिती मिळताच नेर पोलिसांनी घटनास्थळी पोहोचून पंचनामा केला असून पुढील तपास सुरू आहे.
या दुर्दैवी अपघातामुळे परिसरात हळहळ व्यक्त केली जात आहे.
