चंदगड | प्रतिनिधी
कोल्हापूर जिल्ह्यातील अतिदुर्गम आणि निसर्गरम्य अशा चंदगड तालुक्यातील नागवे गावाने पुन्हा एकदा शैक्षणिक क्षेत्रात आपली वेगळी ओळख निर्माण केली आहे. प्रतिकूल परिस्थिती, मर्यादित शैक्षणिक सुविधा आणि ग्रामीण जीवनातील आव्हानांवर मात करत नागवे येथील सख्या भाऊ-बहिणीने एमबीबीएस पदवी प्रथम श्रेणीत संपादन करून गावासह संपूर्ण तालुक्याचा गौरव वाढवला आहे.
पुणे येथे व्यवसाय करणारे नागवे गावचे सुपुत्र गोविंद दत्ताराम नाडगौडा यांनी आपल्या मुलांना उच्च शिक्षण देऊन डॉक्टर बनविण्याचे स्वप्न पाहिले होते. लहानपणी योग्य वैद्यकीय सेवा न मिळाल्याने आई-वडिलांचे झालेले निधन त्यांच्या मनाला चटका लावणारे ठरले. याच अनुभवातून ग्रामीण भागातील आरोग्यसेवेसाठी योगदान देणारे डॉक्टर घडविण्याचा त्यांनी निर्धार केला होता.
या निर्धाराचे पहिले फळ दोन वर्षांपूर्वी मिळाले. त्यांचा मुलगा डॉ. दर्शन गोविंद नाडगौडा यांनी एमबीबीएस प्रथम श्रेणीत उत्तीर्ण होत वैद्यकीय क्षेत्रात प्रवेश केला असून सध्या ते शासकीय रुग्णालयात सेवा बजावत आहेत. आता त्यांची कन्या कु. हरिता गोविंद नाडगौडा हिनेही एमबीबीएस परीक्षेत प्रथम श्रेणीत यश संपादन करून वडिलांचे स्वप्न पूर्ण केले आहे.
एकाच कुटुंबातील दोन सख्ख्या भावंडांनी डॉक्टर बनण्याचा मान मिळवल्याने नाडगौडा कुटुंबात आनंदाचे वातावरण असून नागवे गावासाठीही हा अभिमानाचा क्षण ठरला आहे.
दत्तगिरी महाराजांच्या पदस्पर्शाने पावन झालेल्या नागवे गावात आजही अनेक मूलभूत सुविधांची कमतरता आहे. अशा परिस्थितीत मिळवलेले हे यश ग्रामीण भागातील विद्यार्थ्यांसाठी प्रेरणादायी ठरत आहे. डॉ. दर्शन आणि कु. हरिता यांच्या यशामागे त्यांचे अथक परिश्रम, आई सौ. सुजाता गोविंद नाडगौडा यांचे संस्कार आणि वडील गोविंद नाडगौडा यांची जिद्द व दूरदृष्टी यांचा मोठा वाटा असल्याचे ग्रामस्थांनी सांगितले.
या यशाबद्दल नागवे गाव, चंदगड तालुका तसेच पंचक्रोशीतील नागरिकांकडून नाडगौडा कुटुंबावर अभिनंदनाचा वर्षाव होत आहे. शिक्षणाच्या बळावर आणि कठोर परिश्रमांच्या जोरावर कोणतेही ध्येय साध्य करता येते, याचा प्रेरणादायी आदर्श या यशस्वी भाऊ-बहिणींनी घालून दिला आहे.
