मुंबई | प्रतिनिधी
महाराष्ट्र राज्य मार्ग परिवहन महामंडळाच्या (एसटी) बसमधून भाडे सवलतीचा लाभ घेणाऱ्या प्रवाशांसाठी १ ऑगस्ट २०२६ पासून नॅशनल कॉमन मोबिलिटी कार्ड (NCMC) बंधनकारक करण्यात आले आहे. सुरुवातीच्या टप्प्यात महिला, ज्येष्ठ नागरिक आणि अमृत ज्येष्ठ नागरिक प्रवाशांसाठी हा नियम लागू होणार असून, पुढील काळात इतर सवलतधारक प्रवाशांनाही या व्यवस्थेत समाविष्ट करण्यात येणार आहे.
राज्याचे परिवहन मंत्री प्रताप सरनाईक यांनी याबाबत माहिती दिली. सवलत योजनांमध्ये पारदर्शकता आणणे, पात्र लाभार्थ्यांपर्यंतच लाभ पोहोचवणे आणि बनावट कागदपत्रांच्या आधारे होणारा गैरवापर रोखणे हा या निर्णयामागील प्रमुख उद्देश असल्याचे त्यांनी स्पष्ट केले.
सध्या एसटी महामंडळाकडून विद्यार्थी, दिव्यांग, महिला, ज्येष्ठ नागरिक, स्वातंत्र्यसैनिक तसेच विविध पुरस्कार विजेत्यांसह सुमारे ३५ प्रवर्गांतील प्रवाशांना भाड्यात सवलत दिली जाते. मात्र, काही ठिकाणी बनावट ओळखपत्रांच्या आधारे सवलतीचा लाभ घेतल्याच्या तक्रारी समोर आल्याने डिजिटल पडताळणीची आवश्यकता निर्माण झाली होती.
महामंडळाच्या माहितीनुसार, राज्यभरात आतापर्यंत ५१ लाखांहून अधिक प्रवाशांनी NCMC कार्डासाठी नोंदणी केली असून, त्यापैकी सुमारे २५ लाख कार्डे सक्रिय करण्यात आली आहेत. या मोहिमेसाठी राज्यभरात ४ हजारांहून अधिक अधिकृत एजंट नियुक्त करण्यात आले आहेत.
प्रवाशांना बस स्थानकांवर १९९ रुपये शुल्क भरून NCMC कार्ड मिळणार असून, कार्डच्या नूतनीकरणासाठी १४९ रुपये शुल्क आकारले जाणार आहे. तसेच कार्डमध्ये किमान १०० रुपयांची शिल्लक ठेवणे आवश्यक राहणार आहे.
एसटी महामंडळाने पात्र प्रवाशांना वेळेत नोंदणी करून आपले कार्ड सक्रिय करण्याचे आवाहन केले आहे. १ ऑगस्टनंतर सवलतीचा लाभ घेण्यासाठी NCMC कार्ड आवश्यक राहणार असल्याने संबंधित प्रवाशांनी याकडे गांभीर्याने लक्ष देण्याची गरज आहे.
