नेर येथे 75 टक्क्यांहून अधिक गुण मिळविणाऱ्या गुणवंत विद्यार्थ्यांचा सत्कार

20 जूनपर्यंत नावे नोंदविण्याचे आवाहन

नेर, जि. यवतमाळ : विद्यार्थ्यांच्या गुणवत्तेचा गौरव करून त्यांना पुढील शैक्षणिक वाटचालीसाठी प्रोत्साहन देण्याच्या उद्देशाने “गुणवंत विद्यार्थी सत्कार सोहळा 2026” आयोजित करण्यात आला आहे. मृद व जलसंधारण मंत्री तथा यवतमाळ जिल्ह्याचे पालकमंत्री मा. ना. संजयभाऊ राठोड यांच्या मार्गदर्शनाखाली हा सोहळा पार पडणार आहे.

सन 2026 मध्ये इयत्ता दहावी व बारावीच्या परीक्षेत 75 टक्क्यांहून अधिक गुण प्राप्त करणाऱ्या विद्यार्थ्यांचा या कार्यक्रमात सन्मान करण्यात येणार आहे. नेर, दारव्हा आणि दिग्रस या तीन तालुक्यांतील शाळांमधून दहावी-बारावीची परीक्षा उत्तीर्ण झालेल्या गुणवंत विद्यार्थ्यांची माहिती संकलित करण्यात येत आहे.

बाहेरगावी शिक्षण घेणाऱ्या विद्यार्थ्यांनाही संधी

नेर-दारव्हा-दिग्रस मतदारसंघातील मूळ रहिवासी असलेले, परंतु शिक्षणासाठी बाहेरगावी जाऊन दहावी किंवा बारावीची परीक्षा दिलेले विद्यार्थी देखील या सत्कारासाठी पात्र असतील. अशा विद्यार्थ्यांनी आपली गुणपत्रिका व आधार कार्डाची छायाप्रत जमा करणे आवश्यक आहे.

कागदपत्रे जमा करण्याची अंतिम तारीख : 20 जून 2026

ठिकाण : जनसंपर्क कार्यालय, शिवाजीनगर, नेर

आवश्यक कागदपत्रे :

• गुणपत्रिकेची ऑनलाईन प्रिंट
• आधार कार्डाची झेरॉक्स प्रत

“हुशार विद्यार्थ्यांचा आमचा अभिमान” या संकल्पनेतून आयोजित करण्यात आलेल्या या उपक्रमामुळे ग्रामीण भागातील गुणवंत विद्यार्थ्यांना प्रोत्साहन मिळणार असल्याची भावना पालकमंत्री संजयभाऊ राठोड यांनी व्यक्त केली आहे. पात्र विद्यार्थ्यांनी वेळेत कागदपत्रे सादर करून या संधीचा लाभ घ्यावा, असे आवाहन आयोजकांकडून करण्यात आले आहे.