शिरपूर | प्रतिनिधी
शिरपूर-चोपडा महामार्गावरील सावेर गावाजवळील जय पेट्रोल पंप परिसरात आज पहाटे भीषण अपघात घडला. केमिकलने भरलेला ट्रक उलटल्यानंतर त्याला अचानक आग लागल्याने परिसरात एकच खळबळ उडाली. सुदैवाने चालक आणि वाहक यांनी प्रसंगावधान राखत वेळेत उडी मारल्यामुळे त्यांचे प्राण वाचले.
मिळालेल्या माहितीनुसार, आज सकाळी सुमारे 6.30 वाजण्याच्या सुमारास केमिकलने भरलेला ट्रक चोपड्याकडून शिरपूरच्या दिशेने जात होता. सावेर गावाजवळील जय पेट्रोल पंप परिसरात अज्ञात वाहनाने दिलेल्या हुलकावणीमुळे ट्रक चालकाचे नियंत्रण सुटल्याचा प्राथमिक अंदाज व्यक्त केला जात आहे. नियंत्रण सुटल्याने ट्रक रस्त्याच्या कडेला उलटला आणि काही क्षणांतच त्याला भीषण आग लागली.
आगीने काही मिनिटांतच रौद्ररूप धारण केल्याने संपूर्ण ट्रक जळून खाक झाला. घटनेनंतर परिसरात धुराचे मोठे लोट पसरले होते. महामार्गावरील वाहतूक काही काळ विस्कळीत झाली असून दोन्ही बाजूंना वाहनांच्या लांबच लांब रांगा लागल्या होत्या.
घटनेची माहिती मिळताच थाळनेर पोलिसांनी घटनास्थळी धाव घेतली. अपघातग्रस्त ट्रक बाजूला करून वाहतूक सुरळीत करण्याचे काम हाती घेण्यात आले. या दुर्घटनेत ट्रकसह केमिकलच्या मालाचे लाखो रुपयांचे नुकसान झाल्याचा अंदाज व्यक्त करण्यात येत आहे.
दरम्यान, अपघाताचे नेमके कारण अद्याप स्पष्ट झाले नसून अज्ञात वाहनाच्या हुलकावणीमुळे अपघात झाला का, याचा तपास थाळनेर पोलीस करीत आहेत. सुदैवाने या भीषण घटनेत कोणतीही जीवितहानी झाली नसल्याने मोठी दुर्घटना टळली आहे.
