पेट्रोल, डिझेल, सीएनजी व गॅस दरवाढीविरोधात संताप व्यक्त
मुंबई | प्रतिनिधी
कांदिवली पश्चिम येथे उत्तर मुंबई जिल्हा काँग्रेस कमिटी (स्लम सेल)च्या वतीने वाढत्या महागाईविरोधात शनिवारी आंदोलन करण्यात आले. न्यू लिंक रोडवरील लालजी पाडा पोलीस चौकीसमोर दुपारी ४ वाजता हे आंदोलन पार पडले.
कॅबिनेट मंत्री Aslam Shaikh यांच्या मार्गदर्शनाखाली आणि उत्तर मुंबई जिल्हा काँग्रेस कमिटीचे अध्यक्ष Farukh Shaikh यांच्या नेतृत्वाखाली हे आंदोलन करण्यात आले. यावेळी पदाधिकारी, कार्यकर्ते तसेच महिला व पुरुष नागरिक मोठ्या संख्येने उपस्थित होते.
पेट्रोल, डिझेल, सीएनजी तसेच घरगुती व व्यावसायिक गॅस सिलिंडरच्या सातत्याने वाढणाऱ्या दरांमुळे सर्वसामान्य नागरिकांचे आर्थिक गणित कोलमडले असून जनतेला मोठ्या अडचणींना सामोरे जावे लागत असल्याचा आरोप आंदोलकांनी केला. केंद्र व राज्य सरकारने महागाई नियंत्रणासाठी प्रभावी उपाययोजना कराव्यात, अशी मागणी यावेळी करण्यात आली.
आंदोलनादरम्यान कायदा व सुव्यवस्था अबाधित राहावी यासाठी कांदिवली पश्चिम पोलीस ठाण्याचे वरिष्ठ पोलीस निरीक्षक करण सोनकवडे यांच्या मार्गदर्शनाखाली चोख पोलीस बंदोबस्त ठेवण्यात आला होता.
या आंदोलनात वसीम खान, मुबारक अली यांच्यासह अनेक पदाधिकारी, कार्यकर्ते व नागरिकांनी सहभाग नोंदविला. महागाईविरोधातील हा लढा अधिक तीव्र करण्याचा इशाराही काँग्रेसच्या पदाधिकाऱ्यांनी यावेळी दिला.
