वयाच्या अवघ्या २५ व्या वर्षी राज्यस्तरीय गौरव; शिक्षण व समाजप्रबोधन क्षेत्रातील कार्याची दखल
कुरुंदवाड | प्रतिनिधी :
शिरोळ तालुक्यातील तेरवाड येथील तरुण समाजसेविका व *‘सिद्धार्थ करिअर अकॅडमी’*च्या संचालिका Diksha Vilas Kamble यांना मुंबईस्थित Dr. Babasaheb Ambedkar Sheti Vikas va Sanshodhan Sanstha या संस्थेच्या वतीने मानाचे मानपत्र देऊन सन्मानित करण्यात आले. वयाच्या अवघ्या २५ व्या वर्षी त्यांच्या शैक्षणिक, सामाजिक आणि महिला सक्षमीकरण क्षेत्रातील उल्लेखनीय कार्याची राज्यस्तरावर दखल घेण्यात आल्याने संपूर्ण शिरोळ तालुक्यात आनंदाचे वातावरण निर्माण झाले आहे.
एम.एस्सी. आणि बी.एड. शिक्षण पूर्ण केलेल्या दिक्षा कांबळे यांनी शहरातील करिअरच्या संधींकडे पाठ फिरवत ग्रामीण भागातील विद्यार्थ्यांच्या उज्ज्वल भविष्यासाठी कार्य करण्याचा संकल्प केला. त्यातूनच त्यांनी तेरवाड येथे *‘सिद्धार्थ करिअर अकॅडमी’*ची स्थापना केली. या माध्यमातून पहिली ते दहावीच्या विद्यार्थ्यांना गुणवत्तापूर्ण शिक्षण उपलब्ध करून देण्याबरोबरच स्पर्धा परीक्षा, पोलीस भरती, सरळ सेवा भरती आणि विविध शासकीय परीक्षांसाठी मार्गदर्शन करून अनेक विद्यार्थ्यांना यशाची वाट दाखवली आहे.
शैक्षणिक क्षेत्रासोबतच समाजप्रबोधन हेही त्यांच्या कार्याचे महत्त्वपूर्ण अंग राहिले आहे. राष्ट्रीय सण, महापुरुषांच्या जयंती आणि स्मृतिदिनांच्या निमित्ताने त्यांनी ग्रामीण भागातील शेतकरी, शेतमजूर, कामगार आणि महिलांमध्ये जनजागृतीचे काम केले. समाजातील अनिष्ट प्रथा, अंधश्रद्धा आणि रूढींविरोधात जागृती घडवून सामाजिक परिवर्तनासाठी त्यांनी सातत्याने प्रयत्न केले आहेत.
विशेषतः महिलांना संघटित करून त्यांचे शैक्षणिक, सामाजिक आणि वैचारिक प्रबोधन करण्याचे कार्य त्यांनी प्रभावीपणे राबवले आहे. त्यामुळे परिसरात त्यांना आदराचे स्थान प्राप्त झाले आहे.
मुंबईच्या गोरेगाव येथील डॉ. बाबासाहेब आंबेडकर शेती विकास व संशोधन संस्था राज्यभर शेती, शेतमजूर, महिला सक्षमीकरण आणि सामाजिक प्रबोधन क्षेत्रात कार्यरत आहे. संस्थेने दिक्षा कांबळे यांच्या कार्याचा स्वतंत्र सर्वेक्षणाद्वारे अभ्यास करून कोणताही प्रस्ताव न मागवता त्यांची निवड केली. विशेष म्हणजे संस्थेचे पदाधिकारी थेट तेरवाड येथे येऊन महिला मेळाव्यात हा गौरव प्रदान केला.
या सन्मान सोहळ्याला संस्थेचे संस्थापक Lalit Babar, प्रोग्राम डायरेक्टर Nandkumar More, मार्गदर्शक Amol Patil, शिरोळ पंचायत समितीचे सभापती Milind Kurane तसेच शिरोळ तालुक्यातील संविधान संवादक आणि विविध क्षेत्रातील मान्यवर उपस्थित होते.
दिक्षा कांबळे यांच्या या यशाबद्दल तेरवाड गावासह संपूर्ण शिरोळ तालुक्यातून त्यांच्यावर अभिनंदनाचा वर्षाव होत असून, ग्रामीण भागातील युवक-युवतींसाठी त्या प्रेरणास्थान ठरत आहेत. त्यांच्या या उल्लेखनीय कार्यामुळे शिक्षण, समाजप्रबोधन आणि महिला सक्षमीकरण क्षेत्राला नवी दिशा मिळत असल्याची भावना नागरिकांनी व्यक्त केली.
