जळगाव | प्रतिनिधी
जळगाव जिल्हा पोलिसांनी शहर परिसरात आज पहाटेपासून सराईत गुन्हेगार, गुन्हेगारी टोळ्या तसेच संशयास्पद हालचाली करणाऱ्या व्यक्तींविरोधात विशेष धडक मोहीम हाती घेतली. पहाटे सुमारे ४ वाजल्यापासून सुरू झालेल्या या कारवाईमुळे गुन्हेगारी प्रवृत्तीच्या व्यक्तींमध्ये मोठी खळबळ उडाली आहे.
जिल्हा पोलीस दलामार्फत राबविण्यात येत असलेल्या या विशेष मोहिमेसाठी मोठ्या प्रमाणावर पोलीस बंदोबस्त तैनात करण्यात आला आहे. तसेच आरसीपी (RCP) पथकासह स्थानिक पोलीस अधिकारी व कर्मचारी यांचीही नियुक्ती करण्यात आली आहे. शहरातील विविध भागांमध्ये नियोजनबद्ध पद्धतीने ही कारवाई सुरू असून संशयित तसेच सराईत गुन्हेगारांच्या निवासस्थानी झडती घेण्यात येत आहे.
यासोबतच शहरातील विविध ठिकाणी वाहन तपासणी मोहीमही राबविण्यात येत असून वाहनांच्या कागदपत्रांची तसेच मालकी हक्काची पडताळणी केली जात आहे. संशयास्पद अथवा मालकीबाबत स्पष्ट माहिती उपलब्ध नसलेली वाहने पुढील चौकशीसाठी पोलीस ठाण्यात आणण्यात येत आहेत.
पोलिसांकडून गुन्हेगारी पार्श्वभूमी असलेल्या अनेक व्यक्तींना ताब्यात घेऊन पोलीस ठाण्यात आणण्यात आले आहे. संबंधितांची सखोल चौकशी करून इंट्रोगेशन फॉर्म भरले जात असून आवश्यकतेनुसार प्रतिबंधात्मक कारवाई तसेच गुन्हे दाखल करण्याची प्रक्रिया सुरू आहे.
जळगाव cityतील कायदा व सुव्यवस्था अबाधित राखणे तसेच गुन्हेगारी प्रवृत्तीवर नियंत्रण ठेवणे हा या विशेष मोहिमेचा मुख्य उद्देश असल्याचे पोलिसांकडून सांगण्यात आले. पोलिसांच्या या अचानक आणि व्यापक कारवाईमुळे गुन्हेगारी प्रवृत्तीच्या व्यक्तींमध्ये धाक निर्माण झाला असून शहरातील नागरिकांनी या उपक्रमाचे स्वागत केले आहे.
